Curt avant che la stagiun d'enviern cumenza, prenda l'Arena da skis Andermatt Sedrun en funcziun duas novas sutgeras. Otg mais han ils responsabels gì temp da construir la nova infrastructura. L'avertura uffiziala è planisada sin ils 12 da december.
Squitsch da temp
Las duas sutgeras ch'èn vegnidas remplazzadas eran vegnidas construidas l'onn 1988.
Nus avain gì tar tut las staziuns ensi ed a val ina colliaziun cun vias. Quai ha simplifitgà las lavurs. Tuttina avain nus mintg'emna gì ina sesida da coordinaziun cun tut ils pertutgads per optimisar il process.
Per il remplazzament han ils responsabels gì a disposiziun mo il temp tranter las stagiuns d'enviern. Quai ha pretendì ina buna coordinaziun da tut las lavurs.
Da nov cun lavineras
Tar la construcziun da las sutgeras veglias avant bunamain 40 onns era il territori a Val Val anc en nagina zona da privel. La revisiun dal plan da zonas l'onn 2019 ha midà quella situaziun. Lura è il territori pertutgà vegnì transfurmà en ina zona cotschna.
-
Bild 1 von 6. Bildquelle: RTR.
-
Bild 2 von 6. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Bildquelle: RTR.
-
Bild 5 von 6. Bildquelle: RTR.
-
Bild 6 von 6. Bildquelle: RTR.
Quai avess impedì da remplazzar las sutgeras. Cun construir lavineras sin las costas a muntogna è la staziun a val ussa en ina zona blaua ed ils stabiliments èn segirads.
Davosas lavurs
Il mument èn tut ils impressaris vid la finiziun da las lavurs. Ils proxims dis vegnan tut ils stabiliments e las installaziuns controllads e collaudads entras ils uffizis responsabels. Suenter vegn anc il persunal intern scolà sin las novas installaziuns e il pli tard ils 12 da december duess tut esser pront per che il manaschi d'enviern possia cumenzar.