Siglir tar il cuntegn

Surselva Arena da skis Andermatt-Sedrun: In ulteriur pass è fatg

La sutgera da 6 «Schneehüenerstock-Flyer» en il territori da skis Andermatt-Gütsch-Alpsura vegn en funcziun oz sonda, ils 3 da mars. Ils responsabels da l'Arena da skis Andermatt-Sedrun quintan da survegnir oz anc la lubientscha da manaschi. Ils 10 da mars vegn questa sutgera inaugurada.

La staziun da muntogna al Schneehüenerstock
Legenda: La staziun da muntogna al Schneehüenerstock ASA, Valentin Luthiger

Colliads en ina direcziun

Ils 10 da mars è era la pista melna marcada e segirada (dentant betg preparada) en direcziun dal pass da l’Alpsura. Ella saja a disposiziun per buns skiunzs, sco i vegn communitgà. Uschia èn ils territoris da skis da Andermatt e Sedrun colliads en INA direcziun. Cun l'entschatta da la stagiun d'enviern 2018/19 è era la pista cotschna da la staziun da muntogna al Schneehüenerstock fin il pass da l’Alpsura preparada.

La staziun da muntogna al Schneehüenerstock
Legenda: La staziun da muntogna al Schneehüenerstock ASA, Valentin Luthiger

Fin 2000 persunas per ura

Il Schneehüenerstock-Flyer po transportar 1600 persunas per ura, cura ch’ella è cumplettada schizunt 2000 persunas. El è 1000 meters lung ed ha 10 pitgas. La staziun da muntogna da questa sutgera e da la telecabina da 10 – il «Schneehüenerstock-Express» che va fin al pass da l’Alpsura e vegn en funcziun cun l’entschatta da la stagiun 2018/19 – è en il medem bajetg.

Il Schneehüenerstock-Flyer
Legenda: Il Schneehüenerstock-Flyer ASA, Valentin Luthiger

Pervia da navaglias e burascas da naiv han ins stuì interrumper adina puspè las lavurs da construcziun a la staziun da muntogna sin 2600 meters.

RR novitads 06:00