Siglir tar il cuntegn

Header

cuntegn

Arena da skis Andermatt-Sedrun Plirs plans, era sin la vart grischuna

Avant radund in onn ha l’interpresa Vail Resort cumprà las pendicularas d'Andermatt-Sedrun. La finamira è d’investir ils proxims onns passa 100 milliuns francs.

La finamira da Vail Resorts è d’investir ils proxims onns passa 100 milliuns francs en il territori da skis dad Andermatt-Sedrun. L’emprima investiziun pli gronda è vegnida realisada la stad passada cun l’ustaria nova ed ils stabiliments da far naiv a Valtgeva.

In'investiziun per il futur, perquai ch'in lieu d’emprender d’ir cun skis saja indispensabel, di Silvio Schmid, manader da project tar l’Andermatt-Sedrun Sport SA. I saja dentant er in signal che la nova possessura Vail Resorts haja ina vista da helicopter, ed acceptia che tut tutgia ensemen, pia che Andermatt-Sedrun e Mustér saja ina singula destinaziun, e betg concurrents u partenaris betg eguals, di Silvio Schmid.

Investir en las sutgeras a Val-Val

Ina finamira saja da remplazzar las duas sutgeras a Val-Val. Quellas sajan vegnidas en ils onns ed era las analisas mussian ch'i dettia tar frequenzas autas in problem cun stuair spetgar.

Ma cura che las pendicularas han cumenzà a planisar avant circa in onn han ellas constatà che l’entira val è en zona cotschna dapi il 2019, declera Silvio Schmid. En zona cotschna na pon ins betg construir novs bajetgs u renovar e remplazzar tals. Alura èsi stà da contractar cun il chantun sur da pussaivladads.

Uss saja ina tala sin maisa, uschia saja pussaivel da far novs stabiliments sch’ins construescha lavineras sin omaduas varts. Ma quai munta investir milliuns avant che pudair insumma meglierar la purschida e quai dovra anc ses temp da persvader e declerar la situaziun a la nova possessura, di Silvio Schmid, ch’ha sez timunà las pendicularas da Sedrun e suenter la fusiun quellas dad Andermatt-Sedrun. Ma impurtant saja da savair che quai dat pussaivladads.

Vail Colorado
Legenda: Vail, Colorado. 1996 aveva Vail annunzià sia fusiun cun Ralcorp Holdings Inc. Keystone

Resort Dieni – cura vegn la dumonda da bajegiar?

Ina da las grondas midadas vegni a dar cun il nov resort planisà a Dieni per radund 1’800 persunas. Quai è in project che vegn a midar l’entira destinaziun, pertge la gronda mancanza il mument saja ils letgs. La frequenza durant las fins d’emnas ed il temp da vacanzas saja buna, ma durant l’emna dettia quai bler potenzial e quel possian ins sulet nizzegiar cun porscher dapli letgs en la regiun.

E qua vegnian alura Dieni e Mustér en il gieu, di Silvio Schmid. Ma il mument è la dumonda da bajegiar tar il chantun en tractanda e la vischnanca da Tujetsch ha confermà ch’els spetgian sin pudair conceder la lubientscha anc avant Nadal, ma garantir na possia la vischnanca era betg quai, ha il president communal Martin Cavegn confirmà sin dumonda da RTR.

Tge è sa midà cun ils novs possessurs?

Per Silvio Schmid ha quai dà pliras midadas, uschia vegnia per exempel discurrì uss bler englais en l’interpresa. Ma era chaussas sco per exempel il controlling saja vegnì pli professiunal.

Ins sentia che Vail Resort è in'interpresa gronda, ma er in'interpresa che respecta la mentalitad e la cultura, accentuescha Schmid. Uschia sajan els vegnì ed hajan observà co tut funcziuna ed era mussà respect per lur basegns.

Ina critica che vegn savens or da la branscha da pendicularas è che Vail Resort na paja betg las pajas adequatas ed engaschia era memia pauca glieud per il manaschi. Quai haja el era gia udì, ma el stoppia dir che Vail Resort haja en quai cas mussà ch’els veglian tgirar er ils collavuraturs, ma per propi dir tge che vegn a sa midar saja l’interpresa americana memia pauc ditg al timun.

RTR actualitad 07:00

Artitgels legids il pli savens