Da la vart songagliaisa dal Piz Dolf è crudada a val la dumengia ina massa grippa. Persunas sco er la chamona da Sardona na sajan betg stadas pertutgadas, scriva la cuminanza d'interess dal patrimoni mundial da l'Arena tectonica Sardona en ina communicaziun.
Il trutg da viandar da la Fuorcla da Trin è serrà. Per cuntanscher la chamona davent da l’alp Sardona è il mument be il trutg vegl accessibel. Ils viandants duain suandar ils mussavias. Davent da Weisstannen ed Elm èn ils trutgs averts.
Il piz da 3'028m sa chatta precis sin il cunfin tranter il Grischun e Son Gagl. Da la vart sursilvana vegn quel numnà Piz Dolf – per tudestg Trinserhorn.
