Siglir tar il cuntegn

Header

video
Anteriura fabrica da ponn a Trun: Artistas e mastergnants portan nova vita
Or da Telesguard dals 30.04.2021.
laschar ir
cuntegn

Art en fabrica a Trun «Insatge en quella fabrica fa, ch'ins less far insatge»

Pliras persunas che fan art e cultura han anflà en las localitads da l'anteriura fabrica da ponn a Trun in nov lieu per lur ateliers. In nov vent sufla, in vent creativ cun blera fantasia.

Questa fin d'emna avran Quirina Lechmann e Gianin Conrad las portas da lur atelier en l'anteriura fabrica da ponn a Trun. Battegià lur lieu creativ han els cun il num «Scala Trun». Là lavuran els e l vulan els era che glieud interessada s'inscuntria en il futur.

Igl è in interessant plaster, la dumonda è schebain ins renconuscha era quai e fa insatge ordlunder. Jau chat il lieu interessant e perquai sun jau era ina da quellas persunas che vul metter qua sin las chommas insatge.
Autur: Gianin Conradartist

Quirina Lechmann ha chattà quest lieu per ella, plitost entras la lavur da ses partenari Gianin. Ella è sopranista e medemamain inchantada dal lieu e dal spiert sin quest areal.

Quest lieu ha segir insatge che fa ch'ins less far insatgè. Jau na pos betg vegnir qua e seser enturn. Jau stoss immediat ir a lavurar.
Autur: Quirina Lechmannsopranista

Che quest spazzi industrial vid pudess esser in bun lieu per lavurar, da questa opiniun è era Fabio Hendry. Blers onns ha el studegià e lavurà sco designer a Londra. Là pulsavia la vita durant set dis e quai 24 uras. Il di finivia mai. Ussa è el turnà enavos e sa chasà cun ses atelier en ils anteriurs biros da la fabrica.

Jau hai pensà, ina fabrica porscha segir ina structura clera. Sche betg là, lura nagliur.
Autur: Fabio Hendrydesigner

Ses objects da la marca Hot Wire Extensions furnescha el in pau dapertut per il mund enturn.

Era Anna e Gian Schmidt han gì ina nova idea. Cun ina maschina da CNC per tagliar ora lenn vulan els crear da tut il pussibel. Da scartiras d'art sin tavlas fin tar mobiglias, pussaivel saja tut. Sulet la fantasia mettia il cunfin. Entras la lavur en il biro d'architectura che sa chatta medemain sin l'areal da la fabrica, enconuscha Anna Schmidt bain quest lieu.

Jau vesel daditg in grond potenzial en quest areal ed i fiss donn da betg laschar viver quest lieu. Uschè in caracter na datti nagliur auter en Surselva.
Autur: Anna Schmidtdesignra d'objects

RTR Telesguard 17:40

Artitgels legids il pli savens

Scrollar a sanestra Scrollar a dretga