Per sia lavur da master per il studi d'art en il spazi public ha Andrina Casutt vulì far ina lavur en sia patria a Falera. In lieu d'inscunter per indigens e segund-indigens – per discutar avertamain las problematicas ch'èn avant maun a Falera, sco per exempel il spazi d'abitar che vegn adina pli rar e pli char per la glieud da Falera.
Quai è la moda e maniera co che la dunna da 28 onns vul far art. Cumenzà aveva ella anc classicamain – cun penel e colur. Uss tutga quai dentant tar in'autra fasa da sia vita ed igl è interessant per ella da vesair quest svilup.
Andrina Casutt na vesa sasezza betg sco in'artista classica. Ella fa art «sin incumbensa», quai vul dir: Sch'insatgi vul realisar in project e tschertga inputs ed ideas, alura è quai il mument ch'ella daventa creativa. En ses temp liber n'ha ella per il mument betg pli uschè savens il desideri da far art. Era cunquai ch'ella po esser creativa mintga di en sia lavur sco manadra da project per events a Turitg.
In di vul ella turnar a Falera e lura sa deditgar pli fitg a projects en il spazi public da la regiun. Sumegliant a sia «Casa Sil Punct» ch'è enfin la fin d'october anc a Falera e che fa – sco Andrina Casutt spera – ils proxims onns ina pitschna tura tras l'entir Grischun.