Siglir tar il cuntegn

Header

Navigaziun

Ina collavuratura da la Spitex serva in ensolver ad ina dunna attempada.
Legenda: Adina dapli persunas dovran agid: La Spitex Cadi ha l’onn passà servì 20% dapli tschaveras. Keystone
cuntegn

Augment da 20% Spitex Cadi ha repartì dapli tschaveras

La Spitex Cadi ha l’onn passà servì radund 12'000 tschaveras, quai è in augment da 20% en cumparegliaziun cun l’onn avant. Era ils kilometers per reparter las tschaveras èn s'augmentads per radund 20%, scriva l’uniun en ses rapport da gestiun 2018.

Sco budgetà fatg sperdita

Il president da l’uniun Spitex Cadi René Epp ha per l’emprima giada pudì preschentar als commembers il rapport da gestiun. Quel serrà cun in deficit da 54’183 francs ed è uschia sco budgetà en il preventiv. Era per il 2019 prevesa l’uniun in deficit da 57’000 francs. Il chapital agen da l’uniun saja dentant tar radund 500’000 francs ed uschia hajan ins in fundament era per ils proxims onns, scrivan ils responsabels.

Suenter ch’ins ha pudì desister ils ultims onns da quintar la cumpart da prestaziuns da tgira al client, ha la suprastanza decis da puspè introducir questa contribuziun, quai surtut sco mesira da precauziun.

211 engaschis novs

L’onn passà ha la Spitex Cadi pudì registrar 211 engaschis novs, quai è in augment da 10%. Il total da las uras prestadas è creschi per 1% sin 28’071 uras. Il mument engascha l’organisaziun 39 collavuraturas e collavuraturs e 304 commembers.

RR novitads 17:00