Il matg 2008 han las vischnancas da Flond e Surcuolm decidì da fusiunar e daventar la vischnanca Mundaun. Jau ma regord bain dal commentari d’in giuven da Surcuolm che ha ditg: «Quai è la fallada fusiun. Nus avessan stuì far ina fusiun cun Sursaissa e betg mo quella fusiun pitschna.»
Ussa pon ins dir: «Ditg e fatg». Ord mia vista è davent da l’emprim di da la vischnanca Mundaun stà cler ch'els ston guardar vinavant per in partenari pli grond. La nova gulivaziun da finanzas vul quai.
Per la vischnanca da Mundaun devi la pussaivladad da sa volver encunter Glion. Mundaun ha dentant preferì la direcziun fusiun cun il «plateau» da Sursaissa.
Qua saja lubì ina pitschna remartga: Sursaissa ha da sias uras elegì il Rumantsch e betg il Talian sco segund linguatg en scola, pia ina sabia decisiun ch’è ussa vegnida dabun ad els. Pertge era Sursaissa è memia pitschen per restar persul. La nova gulivaziun da finanzas pretenda quai.
Enavos tar la fusiun. La vischnanca pitschna Mundaun cun 300 habitants che fusiunescha cun ina vischnanca dad 800 abitants. Ussa pon ins sa dumandar: «È quai la davosa fusiun per ils da Mundaun?» Jau schess per il mument gea. Sch’i na dat betg ina vischnanca Surselva pudess questa grondezza tanscher e tegnair.
Per la fusiun cun Sursaissa pos jau mo far cumpliments. L’idea da dumandar ils convischins avant che insumma entschaiver cun contractivas da fusiun: «Vulais vus daventar bilings?» E la decisiun da fusiunar la scola avant che fusiunar las vischnancas - questa idea è stada geniala ed ha manà ad in resultat surprendent.
Mundaun Sursaissa han emprendì ord autras fusiuns co ins sto far la chaussa endretg. Las proximas fusiuns vegnan a pudair far cumparegliaziuns e sch’els en sabis copieschan els ils da Mundaun e Sursaissa.