Durant che Luina sto vegnir a frida da viver senza ses meglier ami, ch'ella ha pers tras in accident, emprenda ella a conuscher Linus. E Linus mussa a Luina in mund dal tuttafatg magic e fantastic. Quai è ina fitg curta resumaziun dal nov cudesch da fantasy «Sozius» da l'autura sursilvana Lara Spescha.
Lara Spescha ha ina gronda passiun en sia vita, numnadamain raquintar istorgias. Uschia scriva ella gia dapi la 4. classa quasi mintga di vi da differentas istorgias. «Sozius» è sia emprim'istorgia, ch'ella haja vairamain il sentiment che quella sto «ir or en il mund». Il roman da bunamain 500 paginas saja ses «baby», sco ch'ella di cun luschezza.
La dunna da 29 onns è dentant betg in'autura fitg tipica. Durant ch'ella creescha cun ses pleds in mund da fantasia che sias lecturas e ses lecturs pon lura s'imaginar – n'è ella sezza betg abla da s'imaginar quest mund. Lara Spescha ha «aphanstasia». Quai vul dir che ses tscharvè na po betg s'imaginar maletgs. Per ch'ella po per exempel tuttina descriver sias figuras dovra ella in maletg fisic avant ella, ch'ella po lura descriver. Sper l'aphantasia che influenzescha il scriver da Lara Spescha è l'autura era legastenica - quai ch'ha anc pli gronda influenza senn ses scriver.
I saja dretg caotic en ses chau, sch'ella scriva sajan quai bustabs che sa midan u pleds ch'èn sutsura. E cunquai ch'ella ha dapli sbagls che auters custan il lectorat ed il correctorat tar ella dapli. Ma cunquai ch'il desideri da raquintar istorgias saja talmain grond na sa lascha ella betg tegnair si da la Legastenia e sias consequenzas. Ella haja simplamain il sentiment dad «esser ina vusch». E perquai vul ella communitgar cun la glieud, raquintar da sias experientschas ed atras quai forsa era gidar a la glieud.