L’exercizi fa il maister, di in proverbi. La scolina da Mustér ha prendì a cor quai ed è quest'emna sin las pistas da Mustér. La gronda part dals uffants van sin las pistas en il territori da skis, radund dudesch uffants emprendan sin las pistas d'exercizi Sax sur il vitg. Qua pon els emprender tut ruassaivlamain dad ir cun skis.
Cun plaschair emprender dad ir cun skis
Schebain ch’i naiva e fa fraid ves'ins il plaschair dals uffants. Accumpagnà vegnan els da trais scolastas da skis da Mustér, tranter ellas er Natalia Giger. Dapi otg onns è ella mintg'onn sin pista e mussa als uffants, co ch’ins fa las emprimas stortas. L'emna da skis para ad ella ina bun'acziun.
Quai è in avantatg per noss uffants, ils geniturs ed nossas scolas.
Ella è cuntenta ch'i dat quellas emnas tradiziunalas da skis. Tras quai possian ils uffants emprender endretg dad ir cun ils skis. Il pli impurtant per Natalia Giger èsi, ch'ils uffants emprendan da franar endretg e da sa sentir segirs sin ils skis. Plinavant èsi impurtant ch'ils uffants pon duvrar sezs il runal.
RR actualitad 07:00