Ina da quellas persunas è Erwin Juon. Sia chasa paterna e la stalla èn vegnidas destruidas. Cura ch’il fieu è rut ora, era el gist a chasa ed ha stuì observar co tut ha ars.
El ha dentant reconstruì la chasa ed abitescha era 10 onns suenter la catastrofa anc adina el medem quartier. Dal brischament na vesian ins nagut pli, tut ils donns sajan reparads e novas chasas hajan remplazzà ils bajetgs destruids. Las stallas na sajan dentant betg vegnidas reconstruidas. I dettia mo pli chasas d’abitar e la gronda part da quellas sajan abitaziuns secundaras.
Nov quartier cun auter caracter
Quellas abitaziuns secundaras hajan midà il caracter dal quartier. Blers abitants da pli baud na sajan betg pli vischins.
Intgins dettia anc, la gronda part sajan dentant possessurs d'abitaziuns secundaras. Il contact cun quels saja cordial, dentant betg uschè stretg sco cun ils vischins da pli baud.
Cumparegliaziun dals maletgs
Quella midada avessi dà tenor Erwin Juon uschia u uschia, il brischament haja forsa schizunt accelerà quella. Il nov quartier cun chasas modernas e gronds curtins plaschan a Erwin Juon. Ed era en sia atgna nova chasa sesenta el bain.
