Malgrà enviern cun pauca naiv, avran ils prims pass tuttina pir la fin d’avrigl, il pass dal Flüela è l'emprim, gia ils 21 d'avrigl. Quai haja surtut da far cun il glatsch sin via. Pir cura ch’il glatsch saja sut controlla possian ins era dar liber las vias sur ils pass. Quai surtut per evitar in privel per autos cun pneus da stad, u era per töffs, di Gion Hagmann, schef dal mantegniment da vias. Ma vis sur tut ora saja l’enviern passà stà in enviern plitost ruassaivel per il mantegniment da vias. Uschia hajan ins era betg gì bleras lavinas fin en la via; quai che muntia adina lavur supplementara per rumir, di Hagmann.
Il mument sajan ins dapertut vidlonder da rumir las vias cun las maschinas grondas, e vida lavurs da mantegniment necessarias. Uschia possian ins dir che plirs pass vegnian averts pli baud ch’usità.
Averturas planisadas dals pass grischuns
| 2022 | 2021 | |
| Pass d'Alpsu | 29 d'avrigl | 27 d'avrigl |
| Pass dal Spleia | 27 d'avrigl | 30 d'avrigl |
| Pass dal S. Bernardino | 29 d'avrigl | 14 da matg |
| Pass da l'Alvra | 6 da matg | 21 da matg |
| Pass da l'Umbrail | fin matg | cumenzament zercladur |
| Forcola di Livigno | 6 da zercladur | 7 da zercladur |
| Pass dal Flüela | 21 d'avrigl | nagina indicaziun |
Lavur pretensiusa cun maschinas modernas
Las lavurs da rumir ils pass èn pretensiusas. Uschia saja adina da guardar, co che la situaziun da privel è, per exempel era da lavinas bletschas, di Hagmann. La segirtad dals lavurers saja adina l’emprima prioritad. E tar situaziuns da privel vegnian las lavurs immediat interruttas. Alura saja era la lavur cun las maschinas pretensiusa e basegnia gronda concentraziun ed experientscha. Ma cunquai che las lavurs vegnian fatgas regularmain, saja l’experientscha era garantida.
