A Laax na vegnan vendidas naginas cartas dal di. Uschia possian sulet ils possessurs da la carta da l'onn ir cun skis la fin d’emna, ha ditg Eliane Bernasocchi-Volken, la responsabla per il marketing e la vendita da l’Arena Alva. Uschia possian ins garantir che mintgin possia giudair in segir cumenzament da la stagiun. Er saja il dumber total limità sin 1’200 persunas. Durant spetgar sin il Vorab saja quai obligatori da purtar ina mascra che cuvra il nas e la bucca. E per dustar la fom vegnian purschidas mangiativas ordadora sco per exempel grils.
Digitalisaziun in avantatg
Per l’Arena Alva saja da grond avantatg ch’els hajan gia daditg mess paisa sin la digitalisaziun. Uschia possian els profitar che l’app da Laax saja etablida. Planisà per la stagiun saja da vender sulet cartas dal di sin via digitala. Quai per evitar colonnas, ma er per pudair communitgar cler, cura che las capacitads da persunas èn cuntanschidas. Era nov sin la stagiun d’enviern saja la purschida ch’il giast po empustar il mangiar da la maisa en l’ustaria via applicaziun ed uschia evitar contacts betg necessaris, di Eliane Bernasocchi-Volken.
Empustar il plaz en cabina ad Andermatt
En il territori da skis d'Andermatt-Sedrun cumenza la stagiun cun l’avertura dal Gemsstock. Uschia saja il plaz en la cabina gia limità, declera Stefan Kern da l’Andermatt Swiss Alps. Era sajan en tut sulet 1’000 persunas sin il culm. E per evitar colonnas saja necessari da reservar in plaz en la cabina. Uschia hajan els la survista, ma era il giast possia esser pli segir e possia er profitar ch’el sappia exact, cura ch’el haja in plaz en la cabina. Las relaziuns la fin d’emna sajan optimalas e la glieud tschertgia ina occupaziun ora en il liber sco per exempel ir cun skis, accentuescha Stefan Kern. Ed els sajan persvas da lur mesiras.