Siglir tar il cuntegn

Header

cuntegn

Baselgia da Trin In tetg stgir enstagl d’in tetg cotschen

Il matg 2019 ha la plaiv da Trin approvà il project da sanaziun da la baselgia. Dapi sis onns fatschenta quel ussa la suprastanza da la plaiv. Curt avant Nadal ha ella finalmain retschavì la lubientscha da bajegiar. L’entir tetg vegn curclà cun in implant fotovoltaic.

«Jau hai vairamain grond plaschair, las preparativas da quest project han numnadamain custà bleras stentas e fadias», ha Jürg Scheidegger ditg la mesemna envers la FMR. El ha confermà che la plaiv da Trin haja retschavì curt avant Nadal a scrit la lubientscha da bajegiar da la vischnanca. Per els fetschia quai project davaira grond senn, aveva Jürg Scheidegger declerà il matg 2020, lura era el anc president da la plaiv.

Betg be discurrer, era far

El e ses collegas da la suprastanza da la plaiv avevan preschentà in onn avant a la radunanza generala il project da sanaziun da la baselgia da Trin. Quella ha approvà cun gronda maioritad ils plans e concedì il credit da 320’000 francs per l’investiziun cumpletta. Ina summa da 180’000 francs è stada reservada per l’implant da fotovoltaica sin il tetg dal bajetg sacral. A la suprastanza da la plaiv eri gartegià da declerar plausiblamain ch’ins na veglia betg be discurrer da la protecziun da l’ambient, da spargnar energia, da resguardar animals e plantas. Ins veglia era far insatge. Immediat suenter la decisiun positiva ha la plaiv inoltrà la dumonda da bajegiar a la vischnanca.

Per in auter edifizi dal vitg fiss la dumonda stada ina formalitad. Ch’i va dentant per il tetg da la baselgia po quai chaschunar fricziuns. Avant che preschentar il project a la radunanza da la plaiv aveva la suprastanza preschentà l’idea a las autoritads communalas. Sco en blers auter lieus en il Grischun posseda la vischnanca politica il clutger ed il cumin da plaiv la nav. Igl è pia ina interdependenza immobigliara. Cun tutta attaschadadad per il maletg dal vitg saja la midada dal tetg baselgia responsabla, han las autoritads communalas manegià. In tetg da colur antracit duai simplamain remplazzar las tievlas cotschnas. Quellas ha la baselgia da Trin retschavì pir l’entschatta dal 20avel tschientaner. Avant era il tetg da la nav curclà cun schlondas – che eran medemamain stgiras. Sco ussa il tetg planisà per fotovoltaica. Lez è daventà in politicum.

Da muntada regiunala

Sco quai che Jürg Scheidegger ha confermà a la FMR, eri prevesì oriundamain che las lavurs cumenzian la primavaira 2020. Trais onns ha la plaiv stuì batter per la lubientscha. «Ussa entschavain nus definitivamain questa primavaira», declera el. La suprastanza communala na s’empo betg ch’igl ha cuzzà uschè ditg enfin che la lubientscha è arrivada.

La baselgia da Trin è definida cun il status da protecziun da muntada regiunala ed en quel è l’opiniun da la Tgira da monuments be consultativ.
Autur: Maurus Caflisch president communal Trin

I dettia intgins arguments impurtants daco che la suprastanza communala haja lubì l’installaziun d’in implant solar sin il tetg da la baselgia. Per l’ina haja la radunanza da la plaiv confermà pliras giadas ch’els veglian realisar quai project. «Encunter la dumonda na hai era dà nagins protests. Vinavant prendan ils responsabels da la plaiv fitg serius la muntada istoric-culturala dal bajetg ed investeschan fitg bler en l’estetica», constatescha Maurus Baflisch. L’ambient politic e social actual dumondia tals projects innovativs, la suprastanza communala vesi quai cas dal tetg da la baselgia sco contribuziun a la decarbonisaziun.

Il president communal da Trin finescha sia posiziun cun in fatg interessant: En ina gruppa da project haja la vischnanca empruvà pliras giadas d’includer en la problematica, en in senn constructiv, la Tgira da monuments. «Nus avain vulì sviluppar, cun els ensemen ed en lur senn, in standard per bajetgs istorics. Deplorablamain èn els sa retratgs da quella idea», di Maurus Caflisch.

Artitgels legids il pli savens

Scrollar a sanestra Scrollar a dretga