Surtut en las regiuns catolicas chantan gruppas d’uffants il di da Bavania. Da chasa tar chasa van las gruppas per giavischar in bun onn nov. L’onn passà n’han quellas occurrenzas gia betg pudì vegnir organisadas sco usità ed han stuì vegnir abolidas pervi da la pandemia. Quest onn n’è la situaziun betg propi sa meglierada. Tuttina pon ins udir en pliras vischnancas sursilvanas il chantar da retgs, ma visita en las chasadas na pon els far nagliur.
Pliras vischnancas han improvisà
Las vischnancas ch’organiseschan il chantar retgs, han tuttas planisà quai minuzius. Uschia chantan las gruppas mintgamai durant las messas ed alura per regla avant u en las chapluttas dals vischinadis. Uschia per exempel a Trun. Sco il president da la plaiv Pieder Decurtins ha ditg, saja questa idea vegnida da las scolastas ed ils scolasts da chantar ordadora ed uschia pussibilitar da tgirar l’usit. Uschia possian ins resguardar las mesiras necessarias cun tegnair distanza e tuttina giudair il chantar dals retgs, uschia Decurtins.
Betg vulì metter en privel ils uffants
Autras plaivs ch’organiseschan per regla il chantar da retgs han era quest onn aboli l’usit. Uschia per exempel Falera e Laax. Ins saja sa cunvegnì cun grev cor da betg laschar chantar quest onn ils uffants, di Walter Bearth, president da la plaiv da Falera. Uschia hajan els decis da betg organisar quest onn l’usit. A Falera vegniva mintgamai organisà dals quartiers ina sentupada cun da baiver e dultschs. Quai saja mintgamai ina bella festina per tuts, ma en quest temp da pandemia na fiss ina tala occurrenza betg da responsar, uschia Bearth. Els sajan dentant da buna speranza che l’usit possia l’onn proxim puspè vegnir realisà sco usità.
