Siglir tar il cuntegn

Header

Purtret da Corsin Tuor.
Legenda: Corsin Tuor durant diriger la Brass Band Berner Oberland durant il festival da la chantun rumantscha il 2019 a Trun. RTR, Dominic Pohle
cuntegn

Bayrische Brass Band Akademie Corsin Tuor daventa schefdirigent en Bavaria

Il Sursilvan Corsin Tuor, naschì 1963 e creschì si a Trun, daventa nov manader musical da la Bayerische Brass Band Akademie (3BA). Sco quai che l'academia scriva en ina communicaziun uffiziala, intensiveschia ella cun quai la collavuraziun cun Corsin Tuor. En temp da malsegirezza en la scena da cultura, veglian omaduas varts accentuar la stabilitad ed investir en il futur. L'academia è enconuschenta en Baviera ed en la scena da brass cun la scursaniziun «3BA», ella sa cumpona da quatter differentas bands. Davent dal schaner 2021 surpiglia Corsin Tuor la batgetta sco schefdirigent e manader artistic da la 3BA Concert Band, la campiunessa actuala da las brassbands da la Germania.

Igl è ina furmaziun ch'è avanzada ils davos onns en l'elita da las brassbands europeicas. Cun trais ulteriuras furmaziuns giuvenilas dispona la3BA d'in grond potenzial per tegnair e sviluppar la qualitad. «Jau ma legrel fitg da surpigliar quest'incarica», ha Corsin Tuor declerà suenter la communicaziun uffiziala. El daventa successur da Benjamin Markl che resta dentant commember da la squadra da dirigents da la 3BA. Al campiunadi europeic dal matg 2019 a Montreux ha quella cuntanschì il meglier restultat en sia istorgia. El sa legria nunditg da pudair surdar a Corsin Tuor la batgetta da schefdirigent e da pudair collavurar vinavant cun el, ha Benjamin Markl declerà.

Il Sursilvan maina il mument la Brass Band Berner Oberland e la Brass Band Fröschl Hall en il Tirol, vitiers è el bandleader da la Mountain Swing Big Band. En pli instruescha el a la Scol'auta d'art a Berna ed è manader da la partiziun dals instruments da sturs, batteria sco era musica e moviment da la Scola da musica da la citad da Lucerna. Corsin Tuor abita cun sia famiglia a Sempach.

Ord l'archiv:

Artitgels legids il pli savens

Scrollar a sanestra Scrollar a dretga