Siglir tar il cuntegn
cuntegn

Surselva «Be a Genius» – animar giuvens da returnar en Surselva

Durant ils dis da l’exposiziun da commerzi EX18 a Mustér vegnan preschentads plirs projects inoltrads da giuventetgna indigena. Fin uss èn vegnids inoltrads 10 projects e quels vegnan preschentads en ina atgna halla.

L'occurrenza «Be a Genius» duai cuntinuar ed era esser preschenta en quatter onns a l'EX.
Legenda: L'occurrenza «Be a Genius» duai cuntinuar ed era esser preschenta en quatter onns a l'EX. RTR

L’idea saja naschida cura ch’ins haja ponderà en il comité d’organisaziun co animar la giuventetgna da returnar, di la presidenta dal comité d’organisaziun da l’EX18 Rita Huonder. La plattafurma duai er mussar che blera innovaziun vegnia ord da la Surselva, accentuescha Huonder.

Per ella èsi impurtant da promover la giuventetgna e sco Huonder di – ins possia numnadamain mai far avunda per promover ideas da persunas giuvnas.

Ils projects duajan avair er charn vi da l’oss

Ina da las premissas per pudair sa participar saja ch’il project haja in connex cun la regiun e ch’almain ina persuna saja er d’origin ord da la Surselva, di Huonder. Ma impurtant saja era ch’ils projects inoltrads sajan projects concrets che possian vegnir persequitads sur plirs onns. Tar ils projects inoltrads saja quai era per gronda part il cas, di la presidenta dal comité d’organisaziun da l’EX18. Uschia saja planisà da cuntinuar cun il project e sche pussaivel er fin la proxima EX en quatter onns.

EX18 – cu e co?

L'exposiziun da commerzi EX18 es dals 26 fin als 28 d'october. Quest onn stat ella sut il motto «cun success anavon». Quai vegn ad esser la 11avla exposiziun da commerzi che l'Uniun da commerzi da Mustér organisescha.

Occurrenza da finiziun cun premiaziun il schaner

Gia segir è ch’ils projects victurs vegnan preschentads il schaner en ina occurrenza en la sala da la claustra da Mustér. Qua vegnian alura segir ils megliers ma sche pussaivel tut ils projects danovamain a survegnir ina occasiun da sa preschentar avant che la giuria preschenta ils victurs.

Il megliers trais projects vegnan premiads cun 2’000 francs per il victur, 1'500 per il segund e 1'000 francs per il terz. Ils ulteriurs projects ch’èn vegnids inoltrads survegnan alura ina contribuziun da 500 francs.

RR actualitad 08:00