Siglir tar il cuntegn
Inhalt

Surselva «Be a Genius» – in dals projects inoltrads

Dus giuvens da 17 onns che van a scola en il gimnasi da la claustra da Mustér vulan dar a l’ospital vegl da militar ch’è zuppà en il crest davos la claustra nova vita.

En il mund digital hai immens bleras datas, e questas datas ston vegnir arcunadas sin servers e quels servers ston la finala chattar in plaz. E plaz, gliez avess l’anteriur ospital da militar da la claustra da Mustér. Perquai han dus giuvens da 17 onns Maurus Fry e Flurin Jacomet gì l’idea da realisar ord da questas catacumbas in center da datas.

Blera infrastructura è gia avant maun

Sco ils dus scolars da la 5avla classa dal gimnasi da la claustra da Mustér dian saja l’idea vegnida spontanamain. L’ospital na vegnia betg pli nizzegià ma saja tuttina qua ed er l’infrastructura saja per part gia avant maun. Uschia saja per exempel la segirtad dada, ma er generaturs sajan gia avant maun ed ina ventilaziun installada.

La farm da servers è dentant pir a l’entschatta

Concret na saja il project anc betg, uschia na possian els betg far ina valitaziun dals custs, perquai ch’els n’hajan anc betg l’experientscha. «Qua duvrassan nus agid da persunas scoladas», dian ils dus giuvens. Ma impurtant saja l’idea e forsa chattian els lura investiders u persunas interessadas che vulessan realisar il project.

Durant l’EX18 vegnan preschentads tut ils projects

Durant ils trais dis da l’exposiziun da commerzi a Mustér vegnan tut ils projects inoltrads preschentads en ina atgna halla nua che mintgin po sa preschentar co el vul. Il schaner datti lura la concurrenza finala nua ch’ils victurs vegnan communitgads.

Ma i na saja betg impurtant da gudagnar dian ils dus giuvens. Impurtant saja da dar impuls per in svilup en la regiun e sin la dumonda, sch’els pudessan s’imaginar da returnar en Surselva di Maurus Fry gea, el pudessi s’imaginar quai e Flurin Jacomet lascha avert. Il futur possia purtar tut, di Jacomet.

RR actualitad 08:10