Il president dal cussegl da vischnanca Edgar Durschei ha ditg ch’i saja attractiv da discurrer d’ina reducziun dal pe da taglia, mo el sa dumondia, sche quai fetschia senn sch’ins vesia las cifras da la situaziun finanziala. Auters han fatg attents als gronds projects che vegnian ed era als custs da sanadad. Il vicepresident Roger Tuor ha manegià ch’i fiss in signal fallà da sbassar la taglia.
Daivets creschan
En sia preschentaziun da la situaziun finanziala ha il president communal Francestg Cajacob mussà, che la vischnanca haja pudì sminuir ils daivets da passa 18 sin ca. 4 milliuns francs. Mo ils proxims onns èsi da quintar ch’ils daivets creschian puspè ed il cashflow vegnia pli pigns, e consequentamain dettia quai pli paucs daners per investir.
Tuttina vul la vischnanca investir ca. 20 milliuns ils onns che vegnan: surtut per sanar la chasa da scola ed il center da sport e cultura e per vias, chanalisaziun e serenera.
Consequenzas fatalas
Cun reducir il pe da taglia da 120 a 105 % dessi quai 540’000 fr. pli pauc ad onn.
Las consequenzas fissan tranter auter che la vischnanca stuessi reducir las prestaziuns ed investiziuns e forsa era relaschar persunal. E cun massa daivets èsi da quintar ch’ins vegnissi sut la curatella dal chantun.
La discussiun è vegnida lantschada, perquai ch’in commember dal cussegl da vischnanca veva inoltrà ina moziun per sbassar il pe da taglia. Mo il cussegl da vischnanca da Mustér sco era la cumissiun da gestiun vulan laschar il mument il pe da taglia a 120%.