L'anteriur local da sortida vegn uss renovà cumplettamain per il nov diever. L'uniun vul dar al spazi la parita d'ina stiva sursilvana, mobiglias modernas da biro dattan in cuntrast a las paraids da lain. Plinavant datti ina stanza da sesidas en la cumpart davos.
Il spazi da coworking duess daventar in lieu da scuntrada, nua che la glieud po furmar ina rait.
L'idea d'in biro cumpartì è sa sviluppada avant radund dus onns cun la vischnanca da Glion, l'Uniun da commerzi e mastergn Glion e la Regiun Surselva. A l'entschatta era pli blera glieud involvida. Il project saja en il decurs dal temp dentant stà airi e l'uniun haja uschia surpiglià la realisaziun, di Gian Marco Bianchi, il president da l'uniun Coworking 7130. La vischnanca da Glion accumpogna il project, e vul er vinavant sustegnair il biro cumpartì.
Ils quatter commembers da l'uniun èn Gian Marco Bianchi, Natalia Godglück, Alexis Gehrt e Gudrun Ziermann. Tenor Gian Marco Bianchi saja lur purschida dumandada. Las emprimas annunzias haja el gia survegnì d'independents che tschertgan in auter spazi da lavurar che lur abitaziun, u era d'interpresas ed uniuns che reservassan gugent la stanza da sesida.
En in segund pass renoveschan la possessura dal bajetg e l'uniun ina stanza pli gronda per pudair porscher in lieu per occurrenzas sco per exempel concerts.
