La fatschenta da sport Curschellas a Sedrun è la stad spezialisada sin rauba da viandar. Il pli savens vendian els chalzers da viandar e vestgadira da viandar, di Franco Curschellas, che maina la fatschenta ensemen cun ses frar Renato e lur geniturs. Ma surtut l’onn passà saja stà in onn extraordinari ed els hajan sentì che rauba da viandar saja pli tschertgada. Perquai saja era la planisaziun per la stad actuala stada focusada sin cumprar avunda material e planisar bain. Per la stad actuala hajan els dentant anc survegnì quasi tut quai ch’els vulevan. Tscherts products na sajan dentant propi betg anc vegnids, di Franco Curschellas.
La planisaziun per la stad 2022 ha gia cumenzà
La gronda midada saja, che la planisaziun per la stagiun da stad 2022 haja gia cumenzà. Anc quest'emna giajan els a Turitg per cumprar rauba per la stad da l'onn che vegn. En cumparegliaziun cun ils onns passads saja quai quasi trais mais pli baud. Ma els veglian esser segirs da survegnir tut la rauba e perquai hajan els gia cumenzà cun la cumpra e la planisaziun. In tschert ristg saja quai segir, perquai ch'ins na possia betg guardar, tge rauba che saja ida bain en stizun e lura agir, accentuescha Franco Curschellas.
Proxim enviern vegni stretg cun material da cursa lunga
Els sajan s’accurschids gia la primavaira durant la cumpra da material d’enviern, che tut il material da cursa lunga saja stgars. Uschia hajan ils furniturs fatg attent ils cumpraders d’empustar ad uras ed era che tschert material na possia betg vegnir furnì sin l’enviern. Ma da cumparegliar cun la producziun da chalzers da viandar, na saja quai betg. Blers chalzers da viandar vegnian producids en l’Europa e las vias sajan perquai pli curtas. Quai saja in avantatg ed el saja optimistic che quai restia er uschia, di Franco Curschellas.
Ord l'archiv:
