Siglir tar il cuntegn

Surselva Bova sur Sedrun - Val Strem resta serrada

La Val Strem sur Sedrun resta serrada per tut il traffic da persunas. In grond bloc da 30'000 fin 40'000 meters cubic pudess anc glischnar giuadora, uschia il geolog responsabel Yves Bonanomi.

Legende: Video Bova sur Sedrun – la Val Strem è serrada abspielen. Laufzeit 2:06 Minuten.
Or da Telesguard dals 15.03.2016.

Enfin che quel n’è anc betg vegnì giuadora na po la val betg vegnir averta. Tut tenor possia quai cuzzar insaquants dis u er in onn, di il geolog.

Ina bova da crappa ha bloccà ier saira enturn las 20:00 la Val Strem circa 1 km sur il vitg da Sedrun. Dapi lura è la val, ch'è cunzunt enconuschenta tar skiunzs da turas, serrada per tut traffic da persunas.

Fin a 200’000 m3 material

Vegnids a val sajan 120’000 - 200’000 m3 crappa grossa cun bler material fin. Ulteriurs 30’000 – 50’000 m3 material sajan schluccads ed en moviment. Ils proxims dis saja da quintar cun ulteriura crappa. Zonas d’abitar na sajan dentant betg periclitadas.

Tschiffada d’aua e reservuar cuverts

Plinavant èn vegnidas cuvertas la tschiffada d’aua da l’energia alpina en la Val Strem. L’ovra electrica Val Strem saja ord funcziun. Il provediment d’electricitad da la populaziun saja dentant segirà. L'infrastructura da l'Ovra electrica Val Strem ch'è sut la bova vegnia probablamain a restar per adina sut la massa da material, scriva l'Agentura da novitads rumantscha.

Era cuverta èn duas tschiffadas d’aua da l’Aua Cristalla, la corporaziun d’aua da la Val Tujetsch. Il provediment d’aua da la populaziun saja dentant era segirà. Sco il president communal da Tujetsch, Beat Roeschlin, ha ditg a l'Agentura da novitads rumantscha quintia el cun donns da milliuns francs.

Appel da spargnar aua

La vischnanca vegnia ad appellar la populaziun da spargnar aua, uschia Roeschlin vinavant. Bun la mesadad da l'aua da la vischnanca vegnia da questas funtaunas. L'aua che maunchi, na possia betg vegnir cumpensada daltuttafatg cun autras funtaunas.

La bova vegn!

Filmà da Samuel e Jeanette Giossi, Sedrun.

Legende: Video La bova da la Val Strem dals 14.03.2016 abspielen. Laufzeit 1:05 Minuten.
Dals 15.03.2016.

10 milliuns francs sut la bova

Sut la bova è vegnida la tschiffada d'aua da l'ovra electrica Val Strem ch'è vegnida renovada l'onn 2008 per var 10 milliuns francs.

Geologicamain interessant

La Val Strem è in object geologicamain interessant. Florian Amann, geolog a lETH a Turitg ha scrit sia dissertaziun davart la geologia en Val Strem. (guarda chaschetta)

RR novitads 11:00