Tge ch'ha cumenzà avant 11 onns cun in computer ed il program dad «open source» QGIS en la chasa da vacanzas a Sagogn è daventà ina fatschenta che dat oz lavur a 22 collavuraturas e collavuraturs. La firma OpenGIS ch’è spezialisada sin programs da geoinfurmaziun è creschida rasantamain en il decurs dals davos onns. Durant ils davos dus onns è il dumber dal persunal s’augmentà da 12 sin 22 persunas. Da tut quellas plazzas ha la firma mo stuì scriver ora ina.
La lavur digitala porta in maximum da flexibilitad
Sco Marco Bernasocchi di, haja la firma recrutà ina buna part dal persunal cun lavurar vi da projects per clients. La collavuraziun cun experts d’autras firmas ha fatg vegnir attent quels sin la firma da Laax. Uschia èn ils spezialists s’interessads per la firma e ses concept.
Cun excepziun da las persunas responsablas per l’administraziun èn tut las collavuraturas e collavuraturs informatichers u spezialists da sistems da geoinfurmaziun. Sco sviluppaders da software dovria il persunal ina infrastructura minimala. Ils blers lavuran a chasa u en spazis da collavuraziun. E quai da Genevra enfin Constanza, u dal Vallais enfin Laax. La digitalisaziun è in avantatg. E tgi auter ch'informatichers duajan vegnir da far quai, manegia Marco Bernasocchi. Tut funcziuna uschia per via digitala. Sesidas fisicas hajan lieu trais enfin quatter giadas ad onn.
La glieud stima fitg da pudair viver nua ch’ella lavura. Quai fa er che las regiuns perifericas na perdan betg ils spezialists.
Betg mo il lieu da lavur è flexibel, er il persunal ha dad esser semtgà cura ch’i ha blera lavur. E possia lura er profitar il proxim mument dad ir cun skis in di da bell’aura. Il quint para dad ir si e la firma ha success: Entschatta november 2022 ha ella gudagnà in premi per la meglra app da fatschenta svizra. La lavur sco er il persunal vegnan tar la firma e betg cuntrari. En l'istorgia curta da la fatschenta ha anc nagin demissiunà.