- Il process democratic ha cumenzà: la populaziun da Breil è dumandada, sch'els vulan in maletg en lur baselgia u betg.
- Tge maletg ch'i savess la finala dar, vegn decidì pir pli tard – er puspè dals parochians.
- La decisiun finala prenda lura la cumissiun da bajegiar da la diocesa.
Uschia sa preschenta la situaziun a Breil
Entras pliras brevs da lecturs en las gasettas, è la populaziun vegnida inquietada. Sco quai che Sep Cathomas il president da la plaiv e commember da la cumissiun per art en baselgia di, possian ils parochians prender posiziun, tar l'idea sco tala da malegiar vi da questa paraid alva en lur baselgia u betg.
Cumparegliaziun dals maletgs
L’artist dispitaivel
L'idea da l'artist Robert Indermaur, sco ella è vegnida preschentada en il fegl sgulant en tut las chasadas da Breil è be ina proposta nunlianta. Gist quella proposta è vegnida en la critica, surtut da persunas ordaifer la vischnanca da Breil. L'artist Indermaur saja influenzà da la secta «Scientology». Per Cathomas valia da scleri la chaussa pli profund.
El è persvadì che si Breil na vegnian betg fatgas chaussas falladas en baselgia, cunquai che la cumissiun da bajegiar diocesana ha il davos pled en chapitel davart tge che vegn malegià vid ina parait en baselgia.
Fatg donn a la chaussa
Ils da Breil na dovran betg il consentiment da persunas ordaifer lur plaiv, sche els vulan in maletg u betg, manegia Cathomas ed era tge maletg ch'els vulan sappian ils parochians da Breil decider senza che insatgi stoppia sa maschadar en. En mintga cas valia uss per la cumissiun d'art en baselgia da Breil da reflectar, quant donn che quellas brevs da lecturs hajan chaschunà per lur idea.
