Siglir tar il cuntegn

Header

cuntegn

Breil Baselgia splendura en nov vestgì

A Breil han ils parochians stuì desister ils davos tschintg mais da lur baselgia parochiala. Durant quest temp è quella vegnida sanada. L'administratur apostolic Peter Bürcher, l'uvestg ad interim, ha benedì la baselgia a chaschun da la sontga Messa da la Rogaziun federala. Per tut ils da Breil in di da legria.

Renovaziun necessaria

La davosa renovaziun da la baselgia amez il vitg da Breil è succedida ils onns 1960. «Il diever e l’aura han laschà enavos lur fastizs dapi lura. Quels eran nunsurvesaivels», ha ditg il president da la plaiv e da la cumissiun da bajegiar Sep Cathomas. Per impedir ulteriurs donns e salvar l'object a lunga vista en sia qualitad è ina sanaziun stada indispensabla. Ils custs per la sanaziun da la baselgia vegnan calculads cun 1,25 milliuns francs.

Igl è emoziunal. La sonda saira, cura ch’ils zains han tunà l’emprima giada suenter tschintg mais – n'hai jau betg gist bragì, ma impressiun hai fatg.
Autur: Sep Cathomaspresident cumissiun da bajegiar

Sustegn finanzial da pliras varts

Per pudair finanziar la renovaziun ha la plaiv arranschà insaquantas acziuns da benefizi. Vegnidas lantschadas èn quellas cun la vendita simbolica dals 189 vaiders da las fanestras da la fatschada dal sid da la baselgia. Igl è suandà in concert da beneficenza u er la vendita simbolica da 218 segments dal fresco da son Cristoffel dasper l’entrada da la baselgia.

«Las acziuns e las bleras donaziuns han purtà a nus la summa da 272'000 francs», di Sep Cathomas. La plaiv ha ultra da quai survegnì contribuziuns d’instituziuns, d'uffizis e da la vischnanca politica, uschia ch’il daivet restant da l’investiziun totala da 1,25 milliuns francs munta a la fin anc a radund 400'000 francs.

Istorgia da la baselgia da Breil

Textbox aufklappenTextbox zuklappen

Temps medieval tempriv – emprims fastizs d’ina baselgia

1185 emprima menziun d’ina «ecclesia parochialis»

1392 brischament da la baselgia

1397 benedicziun d’ina baselgia nova

1486 construcziun dal chor gotic cun l'altar dad Ivo Strigel

1493 in segund brischament destruescha per part la baselgia

1504 benedicziun da la baselgia restaurada

1504 construcziun da la part sura dal clutger cun las fanestras goticas

1784 cuvrida dal clutger cun ina cuppa barocca

1808 remplazzament dal palantschieu sura da lain entras in artg da gip

1963-1965 renovaziun da la baselgia

2020 sanaziun energetica

RTR actualitad 17:00

Artitgels legids il pli savens

Scrollar a sanestra Scrollar a dretga