Tar la vischnanca da Breil n’han ins da princip nagut encunter in’uniun ch'unescha ils possessurs d’abitaziuns secundaras, di il president communal Clau Schlosser. «Nus stuain lavurar ensemen cun ils giasts, cunzunt cun quels d’abitaziuns secundaras», di Clau Schlosser. A la suprastanza na saja betg dal tut cler sche la cuminanza d’interess haja la finamira da simplamain betg pajar las taxas u sch’i giaja per lavurar constructiv vid il svilup dal lieu da vacanzas.
La cuminanza da possessurs d’abitaziuns secundaras da Breil e conturn che vegn fundada proximamain vul ch’ils possessurs d’abitaziuns vegnian prendids serius da la vischnanca e ch’ins discurria in cun l’auter sin la medema autezza. Quai han ils iniziants enturn Ignaz Derungs ditg tar l’infurmaziun da sonda passada. Discurrer sin il medem nivel in cun l’auter vali viceversa, di Clau Schlosser. I na sappia betg esser che la vischnanca vegnia tractada da possessurs d’abitaziuns secundaras sco quella che spetgia sin almosnas si da la bassa e saneschia cun las taxas da turissem la cassa communala. Uschia saja magari d’udir. Clau Schlosser spetga era ch’i dettia ina collavuraziun constructiva e ch’i na vegnia betg fatg polemica cun cifras che na constettian betg.
Autezza da las taxas
Sper la finamira dad esser la vusch dals possessurs d’abitaziuns secundaras vul la cuminanza d’interess era s’engaschar per taxas adequatas. Concret vul quai dir per taxas pli bassas. Tenor Clau Schlosser n’èn quellas dentant betg memia autas. «Nus avain gia sbassà las taxas sin il minimum suenter las discussiuns en vischnanca». Sch’ins veglia sviluppar enavant la vischnanca dovria quai daners, di Clau Schlosser vinavant. Anc na possian ins betg dir quants daners che restian suenter avair mantegnì las purschidas turisticas existentas. Ma sch’i restia insatge lura vegnia quai da bun als giasts. Là è la vischnanca era pronta da prender encunter ideas e giavischs, uschè lunsch che quels èn realistics.
Paucas reclamaziuns
La vischnanca da Breil ha laschà ora 750 quints. Sulet en 35 cas hai dà reclamaziuns. Sco Clau Schlosser ha ditg sajan quai stadas reclamaziuns pervi da la grondezza da las abitaziuns. Quellas hajan ins gia pudì sclerir. Enturn quatter reclamaziuns haja quai dà perquai ch’ins haja mess en dumonda la lescha sco tala. Quellas sajan anc avertas. Clau Schlosser ha era ditg che var 90% dals quints sajan gia pajads. El interpretescha quai uschia ch’i na dettia betg ina gronda resistenza envers las taxas e ch’ins vegnia a chattar ina communicaziun constructiva cun ils possessurs d’abitaziuns secundaras.
La vischnanca spetga ussa che l’uniun dals possessurs d’abitaziuns secundaras vegn fundada e che quella contacteschia la vischnanca.
