Siglir tar il cuntegn
cuntegn

Surselva Breil: Ina cronica tracta l’istorgia dals Seilers

Adina puspè èn las famiglias dals Seilers da Breil s’inscuntradas. I sa tracta dals descendents da Gion Michèl e Mariuschla Seiler-Cavegn. La cronica lai alura era vegnir a pled ils descendents ch’èn naschids tranter 1924 e 1940.

L’idea da scriver questa cronica saja vegnida il 2004. Ins stuess nudar tschertas chaussas, perquai che la generaziun giuvna n'enconuschia betg pli quest mund puril fin ils onns da 1950. Pir suenter la pensiun haja el dentant gì il temp da prender a mauns la chaussa, raquinta il cronist Michael Friberg (sia mamma era ina figlia dal Gion e da la Mariuschla).

«Nus savevan da nuot»

La cronica dals Seilers cumenza en il 18avel tschientaner. Ma gia a partir dal 1650 entaupan ins quest num. El n'haja dentant betg pudì sclerir, danunder che questa famiglia deriva, di Michael Friberg. Ils Seilers eran purs, ed era ils 10 uffants da Gion e Mariuschla èn creschids si en simplas relaziuns. Quai mussan in pèr citats:

Noss’affonza ei schon stada fetg sempla. Nus savevan da nuot. Ni radio, ni televisiun – nuot.
Che nus mavien a scola ni a perver cauras, nus vevan adina en la medema vestgadira. Quei vegneva scumiau nuot.
Gl’unviern mavan nus cun skis sin Planezzas. Quei eran skis da lenn senza cantas e cun calzers normals. Il ski vegnevan fermaus vid il calzer cun riemas da curom.

La cronica lai reviver temps passads en in ambient puril a Breil nua che la famiglia, la scola e la baselgia dictavan il mintgadi. Ma intginas ed intgins han era stuì bandunar il vitg ed tschertgar autras plazzas, per ex. en hotels, ubain ir a far cura.

Cronica è mai finida

Ed anc adina s’inscuntran ils Seilers. Ils descendents da Gion Michèl e Mariuschla Seiler-Cavegn (che eran maridads ils 21 da zercladur 1923) dumbran oz passa 100 persunas en tschintg generaziuns. E sco Michael Friberg scriva na saja ina cronica «mai finida». El spera che ses parents fetschian vinavant notizias en la cronica.

RR actualitad 11:00