Siglir tar il cuntegn

Header

cuntegn

Breil La chamona dal Biferten vegn manada da dus informatichers

La segunda stad mainan Marianna Barkchieva e Simon Roder la chamona dal Biferten. Quella è sin la ruta da viandar sur il pass dal Lembra, in pass che maina da Breil en Surselva fin a Linthal en il chantun Glaruna. Avant dus onns è la chamona vegnida engrondida e renovada e dapi lura maina il pèr da 30 onns la chamona.

Cura che jau stoi lavar per far ensolver a las quatter da la damaun, lura na poss betg propi, ma cura ch'jau ves las stailas e la levada dal sulegl, lura sai ch'jau hai chattà in zic il paradis.
Autur: Marianna Barakchieva maina-chamona ed informaticra

Marianna Barkchieva è oriunda da la Bulgaria. Ella ha survegnì in stipendi per far la scolaziun da master en l’informatica a l’Universitad da Berna. Suenter ha ella lavurà sco informaticra, ma la lavur davos il computer n’ha betg pli cuntentà. Cun ses ami Simon Roder, era informaticher, ha ella uschia passentà mintga minuta libra en las muntognas, uschia che la decisiun da manar la chamona è sa madirada ed els dus han visà lur plazzas e gughegià l’aventura.

Emprima stad – stad da record

La stad avant in onn è propi stada da l’aura ina stad optimala. Uschia ha la chamona dal Biferten nudà 1'600 pernottaziuns, in nov record. Questa stad gist passada han ils dus maina-chamona registrà 1'300 persunas, era quai saja fitg bun, di Simon Roder. Ma impurtant na saja betg il dumber da giasts, mabain che mintgin sa sentia bainvegnì en lur chamona, di il pèrin. E perquai fan els bler.

audio
Bunura: CAS: Reportascha chamona da Biferten
ord Actualitad dals 19.10.2019.
laschar ir. Durada: 3 minutas 19 Secundas.

Tut products regiunals e la biera fatga sezza

Ils dus giuvens emprovan d'evitar rument en mintga furma. Uschia na datti betg buttiglias da plastic en la chamona. Era emprovan els d’evitar da memia sgols. La stad passada han els stuì sgular trais giadas. Ma quai saja stà pussaivel sulet cun optimar ils sgols.

Cun sgular mintga giada cun bler material si e giu possian ins evitar sgols. Era per evitar rument han els dus empruvà da far biera. Quai saja gartegià fitg bain e las 180 buttiglias sajan lura era stadas davent en fitg curt temp.

Avegnir anc intschert

Il mument hajan els vis la vita en la chamona, din els dus. Uss veglian els passentar l’enviern en la Bulgaria e lura possian els decider sch’i dat ina terza stad sin la chamona dal Biferten.

RR actualitad 06:00

Artitgels legids il pli savens