Siglir tar il cuntegn
Inhalt

Surselva Breil: Nock out

Il Circus Nock na vegn betg a Breil. Quai han ils responsabels dal circus decidì suenter in'inspecziun. Il november avevi anc gì num ch’il Circus Nock vegnia a Breil, sco RTR ha rapportà.

Uschia sco a Mustér vegni betg ad esser a Breil.
Legenda: Uschia sco a Mustér vegni betg ad esser a Breil. RTR, Hubert Giger

Il favrer passà hajan els inspectà il lieu a Breil e constatà che las vias ed ils carauns sajan fitg stretgs. I na saja betg pussaivel d’arrivar al lieu cun ina caravana da fin 24 meters. I saja stà in sbagl ch’els n’hajan guardà l’emprim la situaziun e silsuenter decis enstagl il cuntrari, ha la pledadra da medias dal Circus Nock, Mina Seiler ditg ad RTR.

Trumpà

Els sajan trumpà e chapeschian era che la populaziun da Breil saja trumpada. Mo sco pitschen regal veglian els vender ils bigliets pli bunmartgà als abitants da Breil per las represchentaziuns a Glion ils 16 e 17 d’avust (a Flem è il circus ils 19 e 21 d’avust). Il november avevi anc gì num ch’il Circus Nock vegnia a Breil, sco RTR ha rapportà.

Betg motivs economics

Era per il president communal da Breil, Clau Schlosser èsi stà ina surpraisa ch’il Circus Nock haja la finala detg ch’el na vegnia betg. El manegia che la raschun persuenter saja plitost ch’els hajan chattà in lieu pli central ed ideal.
Ma quai na lascha Mina Seiler betg valair. Il Circus Nock giaja gugent en lieus pitschens e là hajan els mintgamai era grond success.

RR actualitad 08:00