Il favrer 2019 ha il cussegl da vischnanca da Breil approvà ina nova lescha d’aua. Il zercladur ha el stuì adattar las tariffas. Uss han intgins vischins prendì il referendum cunter questa revisiun. Ils 20 d’avust sto la radunanza communala decider.
In dals iniziants dal referendum è Martin Beer da Tavanasa.
Nus avain prendì il referendum, perquai che las taxas d’aua e d’aua persa èn vegnidas auzadas per differents objects per 100%.
Far ord 3 leschas 1
Sco il president da la vischnanca da Breil Clau Schlosser declera, hajan els stuì crear ina nova lescha suenter la fusiun da Breil, Vuorz ed Andiast. Vul dir: far ord 3 leschas anc 1.
La lescha preveda ch’i dat en l’avegnir ina taxa da diever ed ina taxa fundamentala che vegn quintada tenor la stimaziun d’in edifizi. U detg cun auters pleds: Pli auta che la stimaziun è e pli bler ch’ins paja.
Sch’ins posseda ina chasa cun ina stimaziun dad 1,5 milliuns è la taxa fundamentala pli auta, era sch’i ha en mo ina persuna. Là è il crutsch.
Recurs avant la Dretgira administrativa dal Grischun
Las novas leschas da taxas sa basan sin la stimaziun, di Clau Schlosser. Els hajan midà il sistem sco quai che bleras autras vischnancas en Svizra hajan fatg.
Cunter ils quints d’aua hai dentant dà recurs. Dus sajan schizunt avant la Dretgira administrativa dal Grischun. Perquai manegia il president da vischnanca da Breil ch’i fiss stà meglier da spetgar, tge che la dretgira decida avant che far clamar ina radunanza communala.