Siglir tar il cuntegn

Surselva Breil: Possessurs d'abitaziuns secundaras pretendan transparenza

La radunanza generala da la gruppa d'interess dals possessurs d'abitaziuns secundaras da Breil e conturn ha incumbensà la suprastanza, da sclerir la pussaivladad da trametter in delegà en il cussegl d'administraziun da Surselva Turissem.

Ignaz Derungs, il president da la Gruppa d'interess possessurs d'abitaziuns secundaras Breil e conturn.
Legenda: Ignaz Derungs, il president da la Gruppa d'interess possessurs d'abitaziuns secundaras Breil e conturn. ANR
  • Ils possessurs d'abitaziuns secundaras da Breil e conturn pretendan dapli transparenza da las vischnancas e da Surselva Turissem, co lur daners vegnan duvrads.
  • Per megliurar la transparenza vul la gruppa d'interess trametter in delegà en il cussegl d'administraziun da Surselva Turissem.
  • La gruppa d'interess mida structura. Da nov datti ina gruppa ch'è activa en mintgina da las 4 vischnancas Breil, Sursaissa, Lumnezia e Glion.
  • Era il num mida la gruppa sin «Gruppa d'interess possessurs d'abitaziuns secundaras Surselva».

Ina da las finamiras impurtantas da la gruppa d'interess è la transparenza. Tenor il president da la gruppa Ignaz Derungs, hajan enfin oz ni las vischnancas ni Surselva Turissem declerà en detagl, con che possessurs d'abitaziuns secundaras pajan en total taglias e taxas da turissem e cunzunt per tge che quels daners vegnian duvrads. Quai chaschunia gronda malcuntentientscha tar commembras e commembers.

Sco proponì da la suprastanza, ha la radunanza generala da la gruppa d'interess perquai acceptà ier saira a Breil l'idea da pretender in sez en il cussegl d'administraziun da Surselva Turissem. In delegà dals possessurs d'abitaziuns secundaras gidass tenor Ignaz Derungs da crear dapli transparenza, era gia sche quei delegà avess mo ina rolla sco observatur senza dretg da vuschar. Sche quai saja dentant insumma pussibel, stoppia la suprastanza da la gruppa d'interess uss sclerir cun Surselva Turissem.

Novas structuras

La radunanza generala ha era decidì da crear novas structuras entaifer l'organisaziun. Per pudair discutar pli effectiv cun las vischnancas, vegnan creadas 4 fracziuns, ina fracziun per mintgina da las 4 vischnancas Breil, Sursaissa, Lumnezia e Glion. Quellas 4 fracziuns persequiteschan finamiras communalas, entant ch'il tetg da la gruppa d'interess discuta temas regiunals e chantunals. Cun quella midada da l'organisaziun mida era il num. La «Gruppa d'interess possessurs d'abitaziuns secundaras Breil e conturn» daventa «Gruppa d'interess possessurs d'abitaziuns secundaras Surselva».

RR actualitad 07:00