La raschun per la visada da la cunvegna da prestaziun è tenor il president communal da Breil, Clau Schlosser, ch'il tema lavur da giuventetgna saja adina puspè stà tema en vischnanca.
Nus n'essan mai stads cuntents. Betg exnum cun la lavur sco tala, mabain co la vischnanca è vegnida servida cun lavur da giuventetgna.
Tar la fundaziun «Tür auf - mo vinavon» èsi stà ina surpraisa, declera il parsura da la fundaziun, Roland Just.
I n'è mai vegnì ad ureglia a nus avant la visada che Breil na saja betg cuntent e pensia da visar il contract.
Sco Clau Schlosser di, n'haja la purschida da la Giuventetgna Cadi betg correspundì als giavischs da la giuventetgna da Breil e la purschida n'era betg enconuschenta. Quai na sa Roland Just betg confermà uschia. Lur statistica mussia, ch'era giuvenils da Breil sajan sa participads ad occurrenzas e quai en il medem rom sco las autras vischnancas er.
Nagin local da giuventetgna a Breil
Quai che na saja betg reussì a Breil, saja dad avrir in local da giuventetgna declera Roland Just. Il cumenzament dal 2017 sajan ins dentant stà sin buna via. Clau Schlosser manegia dentant che la Giuventetgna Cadi haja pir lavurà concret londervi, cura che la visada saja stada sin maisa.
I para er dad esser in problem da communicaziun. Quella avess da funcziunar sur il delegà che mintga vischnanca e la fundaziun han en la cumissiun per lavur da giuventetgna en la Cadi. Igl è il gremi che decida la strategia davart las purschidas e che ha era da procurar per il barat d'infurmaziuns tranter vischnanca e cumissiun.
I manca daners ed ulteriuras vischnancas
Sch'ina vischnanca manca, mancan era ils daners da questa. Las ulteriuras vischnancas han decidì da cuntinuar il 2018 cun la lavur sco fin ussa. Da la summa da 18'000 francs che manca, propona la fundaziun da surpigliar la mesadad sezza e l'autra mesadad duai vegnir repartida sin las ulteriuras vischnancas.
Cun tut questas discussiuns han dentant era anc las vischnancas da Trun e Tujetsch visà il contract sin la fin dal 2018. La conferenza dals presidents da la Cadi han lura giavischà che la fundaziun duai far ina retschertga tar las vischnancas per sclerir ils basegns e guardar sch'igl è pussaivel da porscher davent dal 2019 vinavant la lavur da giuventetgna sut in tetg en la Cadi u betg.
RR actualitad 17:00