Siglir tar il cuntegn

Header

Navigaziun

 La chasa Bündner Rigi cun mirs alvs e naiv sin tetg.
Legenda: La chasa Bündner Rigi l'enviern cuntanschibla cun skis. MAD
cuntegn

Surselva Bündner Rigi – senza pista be paucs giasts

In clom d'agid en las medias socialas procura per dispita.

L’ustaria e l'hotel «Bündner Rigi» sa chatta sur Luven sut il Piz Mundaun. Il 1862 è questa chasa vegnida bajegiada ed ella vala sco la pli veglia ustaria da la Surselva. Durant l'enviern è il Rigi mo cuntanschibel sur la via da spassegiar ubain sur la pista dad ir cun skis. Pervi che quella pista n'era quest onn betg vegnida preparada, ha l'ustier André Schaub fatg in appel en las medias socialas.

Cunquai che nus essas pli probabel la suletta ustaria en in territori da skis senza colliaziun cun ina pista, dovrel jau voss agid.
Autur: André SchaubUstier

I giaja per sia existenza appellescha l'ustier en las medias socialas. Sin quest appel hai dà numerusas reacziuns plitost negativas. Blers èn da l'avis che las pendicularas na fetschian betg endretg lur lavur. Josef Brunner, il president dal cussegl d’administraziun da las pendicularas Piz Mundaun, na lascha betg valair quai.

Far ina pista tar in'ustaria ch'è privata n'haja nagina prioritad. Quai vegn fatg senza indemnisaziuns e sulettamain or da buna veglia. Gia dapi 25 onns saja quai il cas ed i na dettia nagin contract che obligass els da far quella pista.
Autur: Josef BrunnerPresident dal cussegl d’administraziun da las pendicularas dal Mundaun

Sco quai che Brunner constatescha n’è questa dispita betg buna per il turissem. I na saja dentant betg uschia che las pendicularas sajan dependentas dal Bündner Rigi, mabain cuntrari. El deplorescha che l’ustier n’haja anc betg tschertgà il discurs. Ma tuttina han las pendicularas reag, ed uschia è il Bündner Rigi dapi il glindesdi saira puspè cuntanschibel sur la pista.

RR Total local 11:45