Il bulieu-chalimar dat immediat en egl. Sco ses num di gia, vesa el or in zic sco in chalimar cun sia bratscha cotschna cun tentaculs. Ina giada sa sviluppà, ha il bulieu-chalimar enfin tschintg bratschs. Il bulieu crescha sur notg or d'in ov da var quatter centimeters. Quel vegn er numnà «l'ov da strias».
Lia Heini-Piacentini è cussegliadra da bulieus en la Surselva ed enconuscha bain il bulieu-chalimar. El toffia fitg e sch'ins giaja datiers d'el cun il nas, alura bitta il tuffien bunamain enavos ins. Cun quest fried particular imiteschia il bulieu ina capiergna. El carmala uschia natiers mustgas ed auters insects. Quels sgolan sin il bulieu e vegnan en contact cun la surfatscha mutschignusa e repartan las sporas cura ch'els sgolan vinavant.
Il bulieu-chalimar vegn oriundamain da la regiun Australia, Nova Zelanda e Malaisia. El è vegnì importà cun la launa nursa. Forsa haja schuldada importà il bulieu en l'Europa. Sin il continent europeic hajan ins chattà l'emprim bulieu-chalimar enturn l'onn 1910 en Frantscha. Dapi lura è el sa derasadà en l'entira Europa. En Svizra chattan ins el surtut en las Prealps ed en las Alps.
Blers èn fascinads cura ch'i vesan il bulieu-chalimar e pensan ch'els hajan chattà insatge extraordinari.
Il bulieu-chalimar na fa nagins donns e n'è betg invasiv. Uschia che Lia Heini-Piacentini cusseglia da laschar star il bulieu. El saja bel da contemplar. Per tut quellas e quels che maglian gugent bulieus è impurtant da savair: Il bulieu-chalimar n'è betg da tissi, ma el è nunmangiabel.
