Siglir tar il cuntegn
cuntegn

Surselva Bun'aura da stad è er bun'aura per renovar il Burleun

Il restaurant Burleun en il territori da skis da Breil/Vuorz/Andiast è vegnì renovà la stad passada. Perquai che l’aura è stada optimala èn las lavurs in zic pli avanzadas che planisà.

Il restaurant da muntogna Burleun era vegnì vendì avant circa in onn da las pendicularas a la Burleun Gastro SA. Quai è in'interpresa ch’è colliada stretg cun l’interpresa d’immobiglias Brügger da Meiringen en il chantun Berna. Ils possessurs novs han investì la stad passada dus milliuns francs en la renovaziun. Las lavurs da renovaziun han grazia a la bell’aura da stad pudì vegnir realisadas svelt, quai ha confermà il mainafatschenta Stephan Dummermuth.

Nova pendiculara fiss betg gist sper l'ustaria

Ils plans da las pendicularas da Breil/Vuorz/Andiast pudessan dentant far in stritg tras il quint da la Burleun Gastro SA. Igl è numnadamain planisà da realisar ina pendiculara cun cabinas da 10 persunas da la staziun a val fin l’Alp Dado. Quai vul dir che la nova pendiculara na fiss betg gist en la vischinanza da l'ustaria sco la sutgera actuala. Il mument è la staziun da quella numnadamain radund 200 meters sut l’ustaria Burleun.

Ma tant ils responsabels da las pendicularas sco era ils responsabels da la Burleun Gastro SA vesan ina schanza en ils plans da las pendicularas e nagin impediment da far las investiziuns. Ils giasts vegnian pervia da la purschida en il Burleun, ha accentuà Dummermuth.

Purschida regiunala

Il Burleun vul porscher en il futur surtut products regiunals. Quai saja la strategia, era sch'ils pretschs sajan per part pli chars apprezieschia il giast ils products regiunals e saja tut tenor era pront da pajar in zic dapli, uschia Dummermuth. La reavertura dal Burleun è planisada per ils 15 da december.

RR actualitad 07:00