Siglir tar il cuntegn

Header

cuntegn

Surselva Bun gudogn per Mustér

Il quint 2015 da la vischnanca da Mustér serra cun in gudogn da 273'350 francs. Quai tar entradas da 18'185’430 francs ed expensas da 17‘912‘079 francs.

Il cashflow è tar 2'169’471 francs. Las amortisaziuns muntan a 2'407'043 francs. Quai resulta dal rapport da quint e gestiun 2015 per mauns dal cussegl da vischnanca.

Pudì reducir daivets

Quest bun resultat saja d’attribuir d’ina vart a la disciplina da budget, da l’autra vart a dapli entradas da taglia e da tschains d’aua ed a la vendita d’energia, scriva la suprastanza. Ils onns passads haja la vischnanca pudì reducir marcantamain ils daivets sin 10,5 milliuns francs (quai fa in daivet da 1500 francs per abitant). Uschè haja la vischnanca «il potenzial da realisar e finanziar las futuras investiziuns».

Credit per il Center da sport e cultura

Las investiziuns nettas muntan a 1,5 milliuns francs. Mustér vul tranter auter sanar la chanalisaziun e la serenera, sco er la via Sogn Gions e realisar divers projects forestals.

Venderdi, ils 22 d’avrigl, ha il Cussegl da vischnanca da Mustér da tractar il rapport da quint e gestiun ed era da decider davart in credit da 280'000 francs per sanar la fatschada nord e vest dal Center da sport e cultura.

Custs da sanadad creschan

Ils custs per il sectur da sanadad creschan ed vegnan en futur ad engrevgiar il quint da la vischnanca. Las expensas per l’ospital regiunal sco er per la spitex èn restads, dentant èn ils daners per la tgira sa dublegiads ils ultims tschintg onns, communitgescha la suprastanza communala. Uschia muntan ils custs per il sectur da sanadad per il 2015 da la vischnanca da Mustér tar radund 900’000 francs.

RR novitads 10:00

Artitgels legids il pli savens