La Buna Vista Golf Sagogn SA ha realisà l'onn 2017 in gudogn avant amortisaziuns da 408'000 francs. Quai è il meglier resultat – dapi ch'il club exista – ch’il president dal cussegl d'administraziun Leo Cathomas ha savì preschentar sonda ils 12 da matg a la radunanza generala. Era il dumber da commembras e commembers dal club da golf ha savì vegnir augmentà sin sur 450 persunas. Tenor il president è tant il resultat sco era il dumber da commembras e commembers decisiv per segirar l'avegnir dal club a lunga vista.
Anc betg sur l'aua vi
Malgrà quai bun resultat spetgan anc grondas sfidas sin il club da golf. Ils proxims onns ston vegnir fatgas grondas amortisaziuns vi da la plazza da golf, las maschinas per mantegnair la plazza ston vegnir remplazzadas, credits da bancas pajads enavos ed era la chasa dal club sto, tenor il contract cun ils possessurs da la chasa, vegnir cumprada en 3 onns da la Buna Vista Golf Sagogn SA.
La valita da la chasa dal club munta a ca. 4,5 milliuns francs. Il president Leo Cathomas spera da chattar ina buna schliaziun cun ils possessurs (per gronda part avevan commembras e commembers dal club finanzià la construcziun dal bajetg da sias uras) – per na betg stuair dumandar bancas per agid ed engrevgiar il quint dal club cun credits.
RR novitads 06:00