Siglir tar il cuntegn

Header

cuntegn

Surselva Buna Vista Golf Sagogn sin buna via

Il club da golf dovra entaifer ils proxims dus onns 100 novs commembers per pudair cuvrir tut ils custs. Suenter in onn han els gia chattà passa 50.

Dapi bainprest in onn ha i adina puspè dà acziuns spezialas dal club da golf per chattar novs commembers. Grazia a questas stentas ha il club gia chattà passa 50 novs commembras e commembers.

audio
Novs commembers per il club da golf Sagogn
ord Actualitad dals 17.06.2016.
laschar ir. Durada: 2 minutas 5 Secundas.

Tenor il president dal club Leo Cathomas è quai success cunzunt d’engraziar al fatg che la contribuziun per daventar commember - tar in club da golf è quai il «dretg da giugar» - è vegnida sbassada da CHF 18’000.- sin CHF 9’000.-. Ultra da quai han tut las circa 350 persunas ch'eran gia avant quai sbassament commembers dal club survegnì gratuit in segund dretg da giugar. Quai dretg han els pudì vender ni regalar a persunas enconuschentas, ch’èn interessadas da dar golf.

Il golfist professiunal David Edwards ha divertì il publicum cun ina show da golf.
Legenda: Il golfist professiunal David Edwards ha divertì il public cun ina show da golf. RTR, C. Albin

Ulteriuras acziuns dal club da golf

Per chattar ils 50 commembers che mancan anc, ha il Buna Vista Golf Sagogn organisà era quest onn differentas acziuns. Ina da quellas è stà in di da las portas avertas la dumengia ils 12-06. Dasper la pussaivladad d'empruvar da dar golf ed ina show da demonstraziun d'in profi da golf englais, ha i er dà in turnier «Tiger and rabbit» (tigher e cunigl).

En questa sort turnier dat mintgamai in giugader da golf ensemen cun ina persuna che ha anc mai dà golf. Il giugader (tigher) dat enfin che la balla sa tschenta sin il green.

audio
Turnier "Tiger and rabbit"
ord RTR Audio dals 14.06.2016.
laschar ir. Durada: 3 minutas 32 Secundas.

Lura surpiglia quel che na sa anc betg dar golf (cunigl) ed emprova da sfundrar la balla en la rusna.

Uschia duai ina persuna che na sa betg dar golf survegnir ina buna impressiun, co i è da dar ina runda da golf, senza stuair daventar commember dal club. La speranza dal club è dentant, ch'intginas persunas survegnian plaschair da dar golf e daventian pli tard era commembers dal Buna Vista Golf Sagogn.

Artitgels legids il pli savens