Surselva - Buna Vista Golf Sagogn sin buna via

Dapi bainprest in onn ha i adina puspè dà acziuns spezialas dal club da golf per chattar novs commembers. Grazia a questas stentas ha il club gia chattà passa 50 novs commembras e commembers.

Tenor il president dal club Leo Cathomas è quai success cunzunt d’engraziar al fatg che la contribuziun per daventar commember - tar in club da golf è quai il «dretg da giugar» - è vegnida sbassada da CHF 18’000.- sin CHF 9’000.-. Ultra da quai han tut las circa 350 persunas ch'eran gia avant quai sbassament commembers dal club survegnì gratuit in segund dretg da giugar. Quai dretg han els pudì vender ni regalar a persunas enconuschentas, ch’èn interessadas da dar golf.

Ulteriuras acziuns dal club da golf

Per chattar ils 50 commembers che mancan anc, ha il Buna Vista Golf Sagogn organisà era quest onn differentas acziuns. Ina da quellas è stà in di da las portas avertas la dumengia ils 12-06. Dasper la pussaivladad d'empruvar da dar golf ed ina show da demonstraziun d'in profi da golf englais, ha i er dà in turnier «Tiger and rabbit» (tigher e cunigl).

En questa sort turnier dat mintgamai in giugader da golf ensemen cun ina persuna che ha anc mai dà golf. Il giugader (tigher) dat enfin che la balla sa tschenta sin il green.

Lura surpiglia quel che na sa anc betg dar golf (cunigl) ed emprova da sfundrar la balla en la rusna.

Uschia duai ina persuna che na sa betg dar golf survegnir ina buna impressiun, co i è da dar ina runda da golf, senza stuair daventar commember dal club. La speranza dal club è dentant, ch'intginas persunas survegnian plaschair da dar golf e daventian pli tard era commembers dal Buna Vista Golf Sagogn.