Durant bunamain quatter mais, davent dals 10 da december enfin ils 2 d'avrigl, vegnan las lingias d'auto da posta da Glion enfin Vrin e da Glion enfin Sursaissa Friggahüs ad esser gratuitas. Tenor Ernst Sax da la gruppa «Masterplan Mundaun» è la finamira da far l'access al territori da Sursaissa Mundaun pli attractiv.
Betg mo per skiunzs
Quella purschida vala per tuts, giasts sco era indigens. Ella na duai betg mo esser per ils skiunzs, mabain era per turists che na van betg cun skis. Cun quella purschida sajan numnadamain tut las lingias dal traffic public en las vischnancas Lumnezia e Sursaissa gratuitas.
In onn emprova
Quai test è planisà ina giada per la proxima stagiun d’enviern. Sch'i vegn a dar insatge sumegliant la stagiun d’enviern 2018/19, vegn decidì pli tard. Ils custs da quai test e co els vegnan repartids sin ils quatter partenaris, las trais vischnancas Lumnezia, Glion e Sursaissa e las pendicularas Sursaissa Mundaun, n'ha Ernst Sax betg vulì tradir. Sulet che la clav da repartiziun dals custs saja sumeglianta sco era tar auters projects da quels partenaris.
RR actualitad 07:00
