Curt e concis
- Medis en la Cadi van encunter la pensiun. Anc na datti nagins successurs.
- En l'entira Svizra mancan medis da chasa.
- Medis giuvens vulan pli gugent sa spezialisar empè da daventar generalists ed uschia medis da chasa.
- Las regiuns perifericas èn memia pauc attractivas per in medi da chasa giuven.
- Las vischnancas stuessan daventar activas e stgaffir cundiziuns attractivas.
Er sch'il tema è actual tar ils medis, na fan nagins dad els propi prescha da chattar ina soluziun. La speranza è da survegnir in medi che surpiglia lur pratica. Da tuttas varts hai num ch'i tegnan avert ils egls, ubain ch'i veglian spetgar fin ch'in dals uffants decida, sch'el veglia forsa surpigliar la pratica.
Grev da chattar medis
En Svizra dettia ina gronda mancanza da medis giuvens che veglian lavurar sco medis da chasa, declera Marc Tomaschett, il mainafatschenta da l'Uniun grischuna da medis. «Mo noss bels culms e la bella cuntrada na tanschan betg per ch'els vegnan qua» di el. En la Bassa dettia bleras pussaivladads pli attractivas.
Vischnancas ston procurar per cundiziuns attractivas
Latiers vegni ch'ils medis giuvens na veglian betg lavurar en plazza cumplaina, ed era che dus terzs sajan studentas da medischina che na lavurian pli tard pervi da la famiglia betg cumplain. Il model dal medi da chasa cun atgna pratica saja antiquà, di Marc Tomaschett. Perquai saja impurtant che las vischnancas vegnian activas e tschertgian soluziuns attractivas. Saja quai cun porscher praticas communablas ubain cun sa gidar cun ils medis finanzialmain cun dar credits euv.
RR actualitad 08:00