Investiziuns da circa 60'000 francs
Las rulottas mobilas èn sin il prà «America» sper l’ustaria dal campadi. Là vul ins installar pli blers plazs. I dat sis plazs dapli da la vart dretga, pia il dubel da fin uss. In tal plaz nov cun infrastructura sco aua ed electricitad custa da quai da 10’000 francs, sco il president dal cussegl d’administraziun Hansueli Baier ha ditg ad RTR.
Era il dumber dals plazs stabels vegn augmentà da 80 sin 90, quai per meglierar il resultat dal manaschi. I na saja betg in problem da far quai perquai ch’els hajan avunda terren.
Ustaria è serrada l'enviern
Ina idea che n’è betg vegnida realisada èn pitschnas chasas per famiglias. Els avevan in project da pilot, mo questa idea na saja betg stada economica, perquai ch’ina tala chasetta custia tranter 50’000 e 100’000 francs e saja occupada mo paucas emnas la stad, di Hansueli Baier.
In’autra idea che n’è betg sa cumprovada è da tegnair avert l’ustaria dal campadi l’enviern. Las frequenzas èn stadas memia pitschnas, e perquai n'è ella betg pli averta l’enviern.
Il nov Campadi Trun exista dapi il 2016. L’ustaria cun ses tetg aut ha gia gudagnà premis: 1. rang dal pretsch spezial da Grischun Lain, ed il 3. rang dal Prix Lignum da la Svizra Orientala.
RR actualitad 11:00
