La decisiun da far quella investiziun e cumprar caravans per laschar a tschains saja vegnida la stad vargada. Uschia haja ses bab gì il giavisch da cumprar in tal vehichel e cun avair pliras dumondas da clientas sch’ins pudessi affittar in tal, sajan els sa decidids da cumprar trais caravans, di Remo Huonder che maina la garascha Huonder communabel cun ses bab. E las reservaziuns dettian raschun ad els.
Quasi tut gia laschà a tschains
Durant la stagiun auta da stad, fin l’avust, sajan quasi tut il temp ils caravans sin viadi, di Remo Huonder. E 95% da lur clientella saja da la regiun da Sedrun e Mustér. Quai saja fitg legraivel ch’ina tala purschida nova chattia gia in tal resun, di il garaschist.
Era las experientschas fatgas cun ils emprims clients sajan fitg bunas. La gronda part da la clientella saja famiglias ni persunas pensiunadas, ma da principi possia mintginA affittar lur vehichels che haja in permiss da conduir.
Cumprar ils caravans era ina sfida
Ils caravans èn il mument fitg scarts sin il martgà d’autos. Uschia hajan els empustà lur trais vehichels novs il settember da l’onn passà ed il mars da quest onn sajan els la finala arrivads. Ed il furnitur da lur caravans haja gia menziunà che per l’auter onn stoppian els gia uss far las empustaziuns. Quai saja il mument ina sfida per lur entira branscha e haja era da far cun corona, sumegliant al trend dad ir sin viadi individual cun il caravan, di Remo Huonder.