Siglir tar il cuntegn

Header

cuntegn

Canera la damaun La fin da la rampa da Glion è en vista

Camiuns transporteschan l'aua da Val fin Glion ni Strada. Là mida l'aua sin binari per cuntinuar la via en la Bassa. La rampa a Glion era enfin avant trais onns il sulet lieu da chargiada. Pervia da la canera ha quest lieu dà da discutar.

Dapi 39 onns vegnan ils camiuns stgargiads tar la rampa en la Via Santeri a Glion. Il territori d'abitadi è en quels onns adina vegnì pli datiers dal lieu da stgargiada. Cunquai che l'aua vegniva stgargiada gia da las tschintg la damaun ed uss davent da las sis vegnan ils abitants dal quartier disturbads da la canera. La cuminanza d'interess ruaus da notg Glion West ha adina puspè reclamà, surtut perquai ch'ils camiuns vegnian stgargiads avant las set la damaun.

Lieu da transtgargiada dar la staziun da Schnaus/Strada
Legenda: Lieu da transtgargiada dar la staziun da Schnaus/Strada RTR, FRANCO CAVIEZEL

Cun la staziun da cargo a Schnaus/Strada ha l'Aua da Val midà sistem da chargiar. Adina dapli camiuns èn equipads cun containers, pia cun uschenumnads «Wechselbehälter». Quels pon vegnir chargiads en paucas minutas sin chars da viafier a Strada.

audio
Il cargo da l'aua da Val a Glion
ord Actualitad dals 21.09.2022.
laschar ir. Durada: 4 minutas 31 Secundas.

Nov sistem da chargiar po schliar il problem da canera

Quai è ina gronda midada visavi ils sistem vegl cun la chargiada da palettas singulas. La rampa a Glion vegn vinavant duvrada, però pli pauc. L'aua da Val vul en il futur midar cumplettamain sin il transport cun containers. L'idea è d'introducir camiuns electrics che savessan trair in char-annex, sco Roger Jörger, il schef da la logistica tar «Valser Mineralquellen» ha detg.

Il problem cun las emissiuns da canera tar la rampa a Glion fiss uschia schlià. Yvonne Dünser, la plidadra da medias da la Viafier retica, confirmescha che la fin da quella situaziun a la Via Santeri a Glion saja bainbaud cuntanschida.

Or da l'archiv

RTR actualitad 07:00

Artitgels legids il pli savens