Dilemma dubel
Ils uffants duvrassan dapli temp perquai che las visitas èn limitadas. Da l'autra vart èsi pli grev da rimnar daners per l'uniun Momo che regala temp als uffants che ston star en l’ospital.
Las uniuns da mammas mo era scolas che rimnavan mintga onn daners per Momo, n'han quest onn da corona betg pudì far las fieras da Nadal ed uschia mancan ils daners en la cassa da l'uniun. Il preventiv da quest onn saja stà ina dira nuscha, di la presidenta Valentina Montalta.
Cumprar temp?
Onn per onn regala l'uniun Momo tranter 30'000-40'000 francs per cumprar temp per ils uffants. La vita per ils uffants en l’ospital è normada e temp supplementar da sa fatschentar cun els n'ha strusch insatgi. Qua vegn MOMO en acziun e cumpra cun ils daners rimnads temp da las tgirunzas ubain uschiglio da persunas scoladas che sa fatschentan cun ils uffants. En temp da corona cura che las visitas èn limitadas è quai anc pli impurtant che uschiglio.