En il visier dals cugliunaders saja glieud veglia, di Markus Walser da la Polizia chantunala. Las gruppas ch'opereschan davent da l'exteriur tschertgan lur unfrendas tenor ils nums en il cudesch da telefon. Nums che tunan «vegls», pia nums tradiziunals, han savens er ina persuna veglia che po vegnir contactada. Pervia da quai saja meglier da stizzar il numer da telefon or dal cudesch da telefon. Ils fraudaders èn uschè raffinads ch'el tschertgan lur unfrendas schizunt en las annunzias da morts. Glieud persula è numnadamain pli fitg en privel e savens pli flaivla en quels cas.
L'enguladitsch da rampigns n'è nagut nov: Ils fraudaders telefoneschan ad unfrendas potenzialas. Là nua che la persuna na po betg sa defender e nua ch'ella na gughegia betg da pender si il telefon, tracta il fraudader cun squitsch la persuna, enfin che quella na sa betg pli per tge ch'i va.
Sche Vus n'avais betg gust da discurrer, betg avair scrupels da simplamain pender si!
La victima fetschia lura tut per ch'ella vegnia or da la situaziun. Concret vul quai dir: L'unfrenda surdat daners als fraudaders. Savens sto l'unfrenda ir sin banca e retrair ina gronda summa daners.
Il persunal vi dal spurtegl da las bancas saja scolà ed enconuschia la problematica, uschia Flavia Schaniel da la Banca Raiffaisen a Glion. La persuna ch'ha servetsch al spurtegl dumondia adina suenter per tge che la summa saja. Savens propona la banca er da transferir la summa sche la clientella di ch'ils daners sajan per exempel per in uffizi. Ella fetschia plinavant attent la clienta u il client ch'i dettia quests cas da fraud, quai per guardar sco el reagescha. Sche la persuna na vegnia alura betg ora cun il marmugn, na possia la banca far nagut auter che dar ils daners al client.
Dapli che dumandar suenter e far attent ch'i dat fraud, na pudain nus betg.
Tenor Markus Walser da la Polizia chantunala èn quels daners pers. Sch'ins traplia il gidanter da la banda ch'è en Svizra in flagranti fiss ina restituziun pussaivla, ma quai è rar. Plinavant na sa la polizia betg quants cas da fraud per telefon ch'i dettia, cunquai che blers na vegnian betg annunziads. I fiss dentant impurtant d'infurmar u annunziar ils cas a la polizia per che lezza possia reagir. La polizia po er guardar per agid psicologic professiunal, sche quai è giavischà.
