Siglir tar il cuntegn

Casa Cabalzar a Cumbel Renovada enstagl spazzada

La Casa Cabalzar en la stretga da Cumbel è vegnida renovada suenter che la tgira da monuments ha impedì da spazzar la chasa en il coc dal vitg. Uss lauda la tgira da monuments quella renovaziun sco exemplarica.

  • La vischnanca lauda questa renovaziun, ch'ha pussibilità da mantegnair il coc dal vitg da Cumbel.
  • La tgira da monuments discurra d'ina renovaziun exemplarica.
  • Il possessur Christian Hormann giauda da savair abitar en la chasa cun bler caracter.

Chasa cun istorgia

La chasa ha duas parts: La pli veglia è vegnida construida enturn il 1600. La segunda part ch'è dal 1881 ha in Gion Fidel Elvedi bajegià. El era turnà da la Frantscha sco um bainstant. Ina chasa nobla cun stanzas autas, ch'ins n'enconuscheva betg da lez temp. E da lezzas uras era quai normal da bajegiar las chasas gest sper la via.

Ils onns 1950 è Martin Cabalzar creschì si en questa chasa. E cun ses frars ha el la finala vendì la chasa a Christian Hormann da Pfäffikon en il chantun Sviz.

La chasa tar la stretga da Cumbel

Spazzar u na – la preistorgia

    La vischnanca Lumnezia aveva ponderà da cumprar e spazzar la chasa en la stretga da Cumbel. La finamira era da stgaffir plaz per ina fermada d'auto da posta sco er da schlargiar la via. Quels plans n'ha la tgira da monuments dentant betg sustegnì e mess la chasa sut protecziun.

    Per ils possessurs da lezzas uras, ils frars Cabalzar è quai stà ina ipoteca. Ma la finala è tut ì ora bain. Christian Hormann ha cumprà la chasa ed investì bunamain in milliun francs en quella. El ha collavurà ensemen cun la tgira da monuments sco er cun la vischnanca, uschia ch'i ha la finala dà mo victurs tar quella renovaziun.

     

RTR actualitad 12:00

Artitgels legids il pli savens