Cassa da pensiun da la Viafier retica bajegia a Glion

La cassa da pensiun da la Viafier retica bajegia a Glion duas novas chasas cun 30 abitaziuns. Investì vegn en tut 12 milliuns francs.

Visualisaziun da la nova surbajegiada Sorts II a Glion. Bild in Lightbox öffnen.

Legenda da maletgs: Visualisaziun da la nova surbajegiada Sorts II a Glion. MAD

Las duas chasas sa chattan en il quartier Sorts en il vest da Glion, tranter ils binaris da la viafier ed il Rain.

L’emprima badigliada cun Benno Burtscher (2. da dre.), Rico Carigiet (5. da san.) e represchentants da la cassa da pensiun e da las interpresas involvidas. Avrir maletg en lightbox.

Legenda da maletgs: L’emprima badigliada cun Benno Burtscher (2. da dre.), Rico Carigiet (5. da san.) e represchentants da la cassa da pe... MAD

Planisadas èn tenor Benno Burtscher, il president da la cassa da pensiun da la Viafier Retica, 30 novas abitaziuns da 2 1/2 enfin 4 1/2 stanzas. En quai lieu posseda la cassa da pensiun gia ina chasa da 14 abitaziuns.

Custs da 12 milliuns francs

En ils custs totals da 12 milliuns francs è era cumpigliada ina garascha sutterrana cun 44 parcadis, sco l'architect Rico Carigiet ha declarà. Sur la garascha sutterana, en il center tranter las chasas è plinavant planisà in spazi cun plantas e bancs da seser. L'inauguraziun da la nova surbajegiada è planisada per l'october 2017.

Cassa da pensiun posseda pliras chasas

Il terren nua che la nova surbajegiada Sorts II vegn realisada. Dretg la chasa existenta Sorts I, davos la claustra dominicana da Glion. Avrir maletg en lightbox.

Legenda da maletgs: Il terren nua che la nova surbajegiada Sorts II vegn realisada. Dretg la chasa existenta Sorts I, davos la claustra d... RTR, C. Albin

Sper las chasas a Glion posseda la cassa da pensiun da la Viafier retica anc 10 ulteriuras chasas cun abitaziuns a Cuira, Tavau, Landquart, Puntraschigna e Samedan. Cun las duas chasas planisadas a Glion posseda la cassa da pensiun 270 abitaziuns cun ina valita totala da rodund 80 milliuns francs. Ensemen cun la chasa existenta vegn la surbajegiada a Glion ad avair 44 abitaziuns ed ella vegn ad esser la pli gronda surbajegiada che la cassa da pensiun posseda.