Avant radund 3 mais ha il center da cumpra «Isla» a Schluein datiers da la citad da Glion avert sias portas. Ed i para ch'il center haja success. Tenor Conradin Rüegg il president da la Isla Schluein Immobilien SA - la possessura dal center da cumpra - e dals manaders da las fatschentas en il center registreschan els mintgadi circa 1’000 cleints.
Ils manaders da las fatschentas èn perquai era fitg cuntents cun ils emprims 3 mais. Teno Rüegg han tuttas fatschentas cuntanschì las finamiras per quest temp u schizunt surpassà ellas.
Concurrenza per las butias a Glion
Il nov center da cumpra è in concurrent per las butias a Glion. Per exempel per las drogarias. En il center da cumpra «Isla» datti la drogaria Müller, ina gronda chadaina ord la Germania che porscha bunamain tut quai ch'ins po era cumprar en ina drogaria a Glion.
Franziska Borter la manadra da la Pill Drogaria Glion el center Mundaun, di avertamain ch'ella haja pli paucs clients dapi ch'il center da cumpra «Isla» è avert. La gronda part dals clients regulars sajan stads fidaivels. La clientella occasiunala saja dentant sa reducida, cunzunt pli paucas persunas giuvnas vegnian en sia drogaria.