Siglir tar il cuntegn

Header

cuntegn

Surselva Center da requirents d’asil a Mustér

Il Hostel Cucagna (l'anteriur Hotel Bellavista) en il center dal vitg da Mustér daventa in center per requirents d'asil. Sco quai che la regenza grischuna ha communitgà vinavant ha il dumber creschent dals requirents d'asil sfurzà il chantun d'agir.

Ils emprims requirents d’asil vegnan primavaira ubain baud la stad a Mustér. Quai ha il schef da l’uffizi chantunal da migraziun Marcel Suter ditg ad RTR. Il chantun haja fatg in contract da 10 onns. Tge requirents d’asil che vegnan en l’Hostel Cucagna n’è betg anc decidì, ma en scadin cas betg famiglias cun uffants da scola. La vischnanca n’è betg gist entusiasmada da questa decisiun dal chantun ha ditg Francestg Cajacob sin dumonda da Radiotelevisiun Svizra Rumantscha. Per in lieu turistic sco Mustér fissi stà d’avantatg sche l’object fiss stà a l’ur dal vitg e na betg gist en il center.

Tschertgà ina soluziun per Hostel Cucagna

Sco il possessur dal Hostel Cucagna, Fabian Schwarz ha ditg a Radiotelevisiun Svizra Rumantscha ha el contactà il chantun, perquai ch’el n’è betg vegnì da vender il hostel. Dapi trais onns abitescha el cun sia famiglia a Trin. Manar il Hotel Cucagna ed il Hostel cun in directur senza esser sez en il lieu na funcziunescha betg. Per il Hotel Cucagna hajan els la finala chattà ina soluziun cun vender ad ina nova societad che fa londeror abitaziuns. Per il hostel hajan ins ussa chattà il chantun sco bun partenari. Il hostel vegn quest enviern anc manà tut normal e la primavaira vegn fatg adattaziuns vid l’infrastructura. Questas vegnian fatgas entras il chantun ha Fabian Schwarz ditg.

«Insanua stoni ir»

I dat cunzunt duas opiniuns tar la populaziun da Mustér nua che requirents d’asil vegnan a sa chasar. Ils ins han chapientscha ch’ils fugitivs dovran insanua in lieu nua ch’els pon abitar. En auters lieus saja sa mussà che quai giaja bain. Auters èn plitost resalvads ed han dubis che quai è bun da plazzar requirents d’asil amez il vitg turistic.

Proximamain, vul dir anc il december, vulan chantun e suprastanza communala da Mustér infurmar la populaziun.

Artitgels legids il pli savens