Atgnamain stuess la votaziun vegnir fatga gia la fin da favrer. L'iniziativa che vul mantegnair e renovar la halla da glatsch «Prau la Selva», è numnadamain vegnida inoltrada il fanadur 2019. E la constituziun da Flem pretenda ch'ina iniziativa valaivla vegnia tractada entaifer 8 mais. Ma quai na tegn la vischnanca da Flem betg en. Adrian Steiger, il president da vischnanca da Flem manegia, il tema saja uschè cumplex, ch'il temp na tanschia betg.
La vul numnadamain preschentar ina cunterproposta tar l'iniziativa. Per preparar questa cunterfatschenta saja il temp dentant stà memia curt. Steiger va perfin uschè lunsch e di che sin il termin da votaziun dals 17 da matg, na vegnia ina tala proposta er anc betg ad esser pronta en detagl. Finamira saja dentant da preparar ina proposta uschè enavant, ch'ins possia prender ina decisiun a l'urna.
Gruppa d’interess «Prau la Selva»
Ils iniziants avessan pudì far recurs da surveglianza tar la regenza pervia dal surpassament dal temp da la vischnanca. Sco quai che Ulrike Hörler la pledadra da la gruppa d'interess «Prau la Selva» ha ditg, desistian els però da far quest pass. Els veglian sa preparar sin la votaziun dal matg. Quai che pudess daventar ina chaussa in pau curiusa cunquai che la cunterproposta n'è insumma betg enconuschenta. Pia cumbattan els il mument anc cunter in fantom.
RTR actualitad 12:00